U Madonbai Rymbai uwa man kam u MDC ka Liang Pyrchah na ka Congress hapoh ka JHADC hawa chimbynta ha ka kynta kylli yukylli hapoh ka Dorbar Tlang wa chi sngi ka JHADC ynnin ka 20 tarik, da pynsñiaw u yei wym pdiang næ ngait yei jubab u Dy. CEM Lasky Rymbai wa em du 5 tylli ki Cement Plant ha East Jaiñtia Hills, deiwa ong u wa boon kiwa tip toh palat 9- 10 tylli haroh i em kini ki karkhana.
Da kylli haroh u wa katwon ka yarong poisa na ki Cement Plant wei heiwon i rukom da chim, neiliang u CEM, u Thombor Shiwat da jubab u wa neibynta ki Raw Materials em ki Major wa Minor wei pyn ar na kini i rukom yoh poisa toh katkam ka yukheiñ wa da booh bhah da ka sorkar yow e bhah cha ka Council.
Wei i yakheiñ hapyrdi ka State wa ka Council leh ym em man Regular ko wei manda yakheiñ leh ym ye u yoh yukheiñ tikna .
Heiyatoh won wa ka Iawmusiang Market Complex, u MB Rymbai da booh yukylli u wa hadooh katwon dadep chna ya ka wei daw yoh mo u wai myntu u snem.
U Dy. CEM da jubab u wa ha ka 5 tarik uni u bnai da em i lai lipait ya kani ka yaaw chirup u Chief Minister ka jylla wei chem ki wa i kreh man iwa da dep hadooh 92%, wei katkam ka Completion Report toh u pyndep ha u bnai December uni u snem 2026, tangwa neidaw wa dang em i jnit i jnat wa dang hap pyndep, ong u boi hapoh uni snem ym pu ye u wai ka, wei sa iwi leh hadien wa dep chna daw e kti leh ka PWD cha ka District Council.
Iwa ye u pyntikna wow yoh u wai ong u toh ha u snem thymme.
U Madonbai da kylli u leh wa neiwon da yoh poisa u pynkreh ya kani ka yaw, heiwa u Dy CEM ong u da e da ka sorkar jylla lyngba ka DCA cha ka PWD yow pynkreh ya kani ka Scheme.
Da pyntip leh wa ki dukan namo ki Stall wa em toh 298 tylli.





Discussion about this post