Kam kiwa kyrchaan ka NPP toh u man kiwa em akor, ymtoh kam ka VPP

Ka NPP ynne ka sngi kam chibynta wow paan na ki paidbah ya i kyrchaan ya ka kyrtong ka NPP ha kani ka Election MP, ka Dr. Ampareen Lyngdoh da pynman ko ya ka yalang paidbah ha Iawmusiang, Jowai.

Ha kani ka yalang da emlang u Symbood Montri Rangbah ka jylla, u Sniawbhalang Dhar, u MLA ka Jowai, u Wailadmiki Shylla, ka MLA ka Sutnga Saipung, ka Santa Mary Shylla, ki MDC ka JHADC wa kiwi kiwi.

U Nehemayah Tyngkan hawa e i klam da ong u wa ha ka 2 tarik da psiah u cha ka NPP heiwa nachwa jooh em u ha ka Congress tangwa da mih noh u na ka neidaw wa kani ka Party ym em soh em sla de ko. 

Da ong u wa da khut kiwa heh ka NPP ya oo wow psiah noh u cha ka hadien wa yachem u ya ki waheh wasian kiwa kyrchaan ya oo. 

Da kyntu u ya ki paidbah wow kyrchaan ya ka Dr. Ampareen neibhah wa hun ko u ieh ya ka chuki Montri wow chakri ya ki paidbah.

Ka Santa Mary Shylla hawa e i klam da ong ko wa i pynchoi dang joor bha i pyrchah ya ka NPP wei ini pynyoo i wa ka Party da khlan bha ko katni. 

Da yaroh ko ya u Wailadmiki Shylla wa da kreh chitom u heiwa da chna ya ki sarok wa miat ha kylleiñ deiwa yaroh ya ki paidbah wa stat u jied ya oo kam u MLA.

Chooh chooh da ong ko wa kam kiwa kyrchaan ka Party toh u man kiwa em akor ymtoh kam kiwa kyrchaan ka VPP kawa pynchongchit khamtam ya ki khynroo khyllood kiwa lai kbai khlem akor pyrchah ya kiwi ki Party heipor wa man yalang ki ha kylleiñ ka Shillong Parliamentary Constituency.

Neiliang won u Wailadmiki Shylla da ong u wa ka Election MP ha uni u snem man ko kawa phær bha lada pait wa kiwa dadep heiwa da ong u wa manda yoo u katni yoo lakam wa da chongchit kani ka Election MP bar ya ki Election MLA.

Da sñiawsih u wow yoo wa chah kbai chah pynchrai heipor wa man yalang paidbah wei wot i yung ka MDC ka NPP leh da chah dat moo i kamtæ da kyrpaad u ya ki paidbah ymtoh wow chongchit ki wei wow man kiwa em akor.

Chooh chooh da yaroh u ya ki paidbah ka jylla ki wym em ngait yeiwa chah pynbaad ka NPP deiwa jied biang ya ka ha u 2023 hadooh wa jop ko ha ki 26 Constituency.

Da pyntip u leh wa ka Meghalaya Games ha uni u snem u man ko ha Jowai weiwa da ye u wow pynku ya ka mang tangka ka chnat Urban Affairs deiwa pynku na Rs. 30 lak cha ka Rs. 5 klur chi snem wow chna ya ki dooid wa kiwi ha kylleiñ ka sor Jowai.

Heijooh i por da kyntu u ya ki paidbah wow jied ya ka MP kamwa da leh nadooh ki District Council, ka sorkar jylla waka sorkar pyrdi.

Ha kani ka sngi da pynlait leh ya i sur yong ka Party.