Lai toor ki khynroo wa yaleh kreh pulit yow paan pynche yei rta kiwa thap kreh

Ki khynroo kiwa da thap yaleh kreh pulit, ynne ka sngi hapoh i yahkhmat ka Barilang Pyngrope da lai leit toor ki cha yung krehkaam yong ka Central Recruitment Board (CRB), kawa em ha Mawroh yow lai paan pynche heiyatoh wa i rta thap kreh pulit wa da pynlait da ka sorkar jylla ha kini ki kajiak sngi wa da dep.

I wan kini ki khynroo toh wym sñiaw yahaap ki yei rta thap kreh ha ka chnat pulit itæ i rta 18 snem hadooh 21 snem heiwa da dawa ki leh wow pynyinsur yei rta thep kreh.

Neiliang ki khynroo da paan pynche ki na ka Secretary yong ka Central Recruitment Board deiwa ong wa kwah ki wa ka sorkar u pynku biang yei rta thap kreh neibhah 18 hadooh 21 snem dang boon ki khynroo ki wym em lait nei puræ.

Kam wow pynkynmoo wa u Montri ka chnat Home (Police), u Prestone Tynsong da dep pynche u yeini deiwa ong wa da dep u pynmih yaka Office Memorandum (OM) ha u Thohlakhmi (Feb) 2022 heiwa da batai che wa ha waroh ki kaam sorkar da pynyinsur yei rta cha ka 32+5 snem, iwa mut hadooh 37 snem i rta lait noh ya ki kattu katni tylli ki chnat wa kynthup yaka Home Police, Excise Registration Taxation & Stamps, Home Guard & Civil Defence waka chnat Forest and Environment neidaw wa emkaam ya ki bru kiwa khlan i doh i pran wa khlanbor.

Da ong u wa katni i kaam pulit ka sorkar da rai ko wow pynbait thymme yei rta thap kreh heiwa heiyatoh wa i kaam Sub Inspector (SI) ka Cabinet da mynjur ko wow e laad hadooh 27+5 snem i pynyinsur iwa mut hadooh 32 snem neibynta ki Schedule Tribe.

Related posts

Dawa ka PSM na u DC ka West Jaiñtia Hills wym toh u chim bai luti ha ka Toll Plaza neibynta ki kari ML04

January 12, 2026

Dawa ka HYC wow su ya ka tulop ki Contractual Nurse wa sahteiñ nadooh u Naichiphaw 

January 12, 2026

Neibynta ki Constable, da ong u wa da booh nadooh 18 snem itæ hadooh 21+5 snem i pynyinsur, iwa mut la e laad hadooh 26 snem ka rta, wei ini i rai toh neidaw wa i kaam toh iwa eh wei emkaam leh wow pyndep yei chah hikai namo ka Physical Training. Neibynta i kaam Followers da ong u wa da chim nadooh 18 snem hadooh 27+5 snem, wei ini i kaam leh toh hadooh 32 snem.

U Prestone da ong u wa ini i kaam toh iwa da leh khyllah du ha kani ka jylla, wei da kyntu u ya ki khynroo wym toh u sñiawthooh bakla ki yei klam kiwa kwah u yah bakla, wei toh u thap ki yei kaam wa lait katkam wa da pynbna namo wa da pynmih Advertisement.