Ka Synjuk Waheh Shnong Ri Jaiñtia (SWSRJ) da kyntu ko ya kiwa chong chnong kamjooh kiwa kitkaam chnong ka Ri-loom Jaiñtia wa kynthup yaka East wa West Jaiñtia wow krehlang wa ki bor District ha kani ka Election MP ka wow man haka 19 tarik.
U President ka Synjuk Waheh Shnong Ri Jaiñtia, u Arminius Lipon da ong u wa ka synjuk kyntu ko ya kiwa chong chnong wa kiwa kitkaam chnong wow man ki bru kiwa em akor em burom wow ri syndong yaki bor synchaar ha ki dong ki chnong khnang waka Election cha ka dorbar bah ka ri u man ko kawa lai bait lai ryntih wa kawa jop khlem em i pait chiliang khmat.
Da kyntu leh ya kiwa chong chnong wow dam u pynmih klumar kiwa ye u pynthut wei iwa ye u pynsihdur yaka Ri-loom Jaiñtia.
Ka synjuk da kyntu ko leh ya ki Waheh Chnong ka Ri-loom Jaiñtia wow kiar na kiwa muaid Politics tangwa wow man kiwa yahkhmat hei synchaar chnong.
Hajrong itæ ka synjuk da kyntu lang ko leh ya waroh wow man kiwa chong chnong wa paitsiar khnang wow lait na i jia wa sñiawsih khamtam ha ka sngi thap Vote.
Da kyntu leh ya kiwa chong chnong ka Ri-loom Jaiñtia kiwa chong wa sah ha khappood yong ka jylla Assam wow wan thap yaka Vote yong ki.
Ka synjuk da kyntu joor ko ya ki Waheh Chnong wow pynbiang ya iwa emkaam kam ka bordiñ, ka um wa kiwi de i emkaam neibynta ki bru yong ka sorkar kiwa wan ha ki chnong ki thaw wow pynlai yaka Election.
Discussion about this post