Lehkmen ki Nurse ka West Jaiñtia ya ka International Nurses Day

Ka International Nurses Day toh kawa da lehkmen ha kylleiñ ka pyrthai da ki Nurse kawa man leh ka sngi wow kynmoo warom ya ka Florence Nightingale kawa man kam kawa pynkylla dur yei krehkaam ki Nurse.

Hajrong ini, neiliang ka Trained Nurses Association of India, West Jaiñtia Hills Unit da pynman ki yei lehkmen haka yalang wa da pynman ha Bishops House Lumbihsyntu, Mihmyntdu, West Jaiñtia Hills District heiwa da thang ya ka charak da u kongsan, u Ferdinand B Basan, Additional Deputy Commissioner ka District. 

Neiliang u Dr. Nichwa LS Nongtdu, Consultant Physician & Diabetologist MBBS, MD, FIDM da embynta u kam u symbood kongsan katwa ka I. Kharduit, Assistant Director of Nursing, President TNAI State Branch da wan ko kam kawa chah khut sñiawbha.

Ka phang pyrdi ha uni snem toh kawa ong, “Our Nurse. Our Future. The economic power of care”. Kawa da klam chaphang ki kaam wa kordor wa da leh ki Nurse yow pynyoh yei chait i khiah wa i yarap ki wow pynduna yei lut i sep dei mynsien wyrai yong ki.

Related posts

U pynkhreh DPR biang ka sorkar yow chna pyndep ya ki yung neibynta kiwa dooh wa duk

November 25, 2024

Pynman ka DMC, SSA West Jaiñtia ya ka yachemlang wa kyrpang

November 25, 2024

Neiliang u kongsan hawa e yei klam da yaroh u ya ki Nurse yei kreh chitom ki neibynta ka imlang sahlang i wym ye de u kheiñ sap. Kamtæ da pynchlur u ya ki wow pteiñ yei kaam wa bha yong ki deiwa pynchlur leh ya ki wow chim chuti neipor cheipor yow yoh ki u chong-ngiah yow yoh bor ki u pteiñ yei kreh kamjooh i chait i khiah.

Neiliang u Dr. Nichwa LS Nongtdu da khana u yeiwa chem u ha oo samen hadooh katwon yarap ki Nurse yow yoh biang u yei chait i khiah hei lai luti u heipor wa chitom u. Kamtæ da ong u wa hadooh katwon kordor i kaam ki Nurse kiwa da e yei chakri nadooh step hadooh wa miet wei da man ki kam u budloom i kaam sumaar sukhær kamjooh man ki kam kiwa yada ya kiwa kjut wa chitom.

Ka Meba-ai Talang, Nursing Tutor, Dr. Norman Tunnel Hospital, Jowai hawa e yei klam phang pyrdi da ong ko wa ki Nurse da man ki kam ka kor kawa pynwan dur yei sumaar sukhær wei i mynsien wyrai yong ki da yarap i ya kiwa boon ki manyung wow lait yei lut phut.

Neiliang ka Nurse Association da pynkup burom ko leh ya ki Nurse kiwa da chong-ngiah kiwa da dep e yei chakri wa kordor.

Kiwi de kiwa klam toh ka I. Kharduit, Assistant Director of Nursing, President TNAI State Branch wei da emlang leh ka Dr. A. Paswet, Medical Superintendent, Jowai Civil hospital, Ialong wa u Dr. War, Medical Superintendent, MCH, Panaliar.