Ha ka 9 tarik uni u bnai, ki chipai ka Border Security Force (BSF) Meghalaya da pynman ki yei pynsñiawthooh paidbah yow yada nei kjut Rabies wei yow tip leh ki dak ki chin kiwa yoh ya kani ka kjut ha ka yalang wa da pynman ha Community Hall ka Muktapur, West Jaiñtia Hills District.
Yeini da leh hadien wa em ar ngut kiwa yoh Rabies heiwa uwi toh uwa na Lakroh katwa uwi won uwa na Muktapur kiwa da pynkit da ki Ambulance ki BSF cha Shillong Civil Hospital.
Ha kani ka yalang da em u Dr. Prajwal uwa na Veterinary Department ka Sector HQ Jowai, uwa da khana kammon wow yada kamjooh i maa i kjut Rabies heiwa da ban joor u yeiwa emkaam u lai e tika dei langær ya ki mrad wa ri wei lada jia wa chah dait wow lai pynyoo cha ki thaw sumaar khlem pynslem.
Ha kani ka yalang da emlang leh u BSF Coy Commander, kiwa chong chnong, u Dr. Seiboklang Buam naka Veterinary Hospital Muktapur wei da chim rai wow pynsñiawthooh yeiwa emkaam u leh heiyatoh wa ini ki kaam.
Neiliang ka BSF Meghalaya da ong ko wa man ko kawa kreh neibynta i bha i miat kiwa chong chnong heiyatoh wa i chait i khiah wei kamjooh leh yow em i chngaaiñ haka imlang sahlang.
Discussion about this post