Ka sorkar pyrdi lyngba ka Home Ministry da saam ko ya ki thup wa nyngkong ki Citizenship Certificates yow man tre ri hadien wa da pynkrehkaam ya ka Citizenship (Amendment) Rules, 2024.
Ya kini ki Citizenship Certificate da saam da u Union Home Secretary, u Ajay Kumar Bhalla ha ka yalang wa da pynman ha New Delhi ynnin ka sngi uwa da e khublei ya kiwa yaleh yow man kam kiwa chong chnong wa pura ka ri India wei da batai u leh yei rukom krehkaam ka Citizenship (Amendment) Rules, 2024 wei da emlang leh u Secretary Posts, Director (IB), Registrar General of India wa kiwi ki heh sorkar kiwa da yaklam wei da jubab yei wym sñiawthooh chaphang ini i kaam.
Kam wow pynkynmoo wa ka sorkar India da pynkrehkaam ko ya ka Citizenship (Amendment) Rules, 2024 haka 11 tarik u Wisu (Mar) 2024 wei hapoh kini ki kyndon namo ki Rules da batai kammon wow yoh ya ki Application Form, kammon wow yaleh lyngba ki District Level Committee (DLC) wei hadien won u lai lyngba ka State Level Empowered Committee (EC) ka wow pait ya kot ki sla.
Da pyntip wa ki Application kiwa da yoh toh na kiwa man kam ki Hindu, Sikh, Jain, Buddhist, Parsi wa Christan kiwa na Pakistan, Bangladesh wa Afghanistan kiwa da psiah cha India hadooh ka 31-12-2014 na ki daw wa chah thombor ki hei pyrtuid ka niam.
Ki District Level Committees (DLC) toh kiwa da khlieh da ki Senior Superintendents of Post/Superintendents of Post katkam wa da thung wei hadien wa da pait da sylli ya ki kot ki sla, daw phah smai ki ya kiwa yaleh man tre ri. Hadien wa dep u leh ya waroh ki kyndon ka aiñ, ki DLC won daw phah ki ya kini ki Application cha ka State Level Empowered Committee wa khlieh da u Director (Census Operation). Ya ki Application toh kiwa da leh lyngba ka Online Portal.
Ka Empowered Committee, Delhi wa khlieh da u Director (Census Operation), Delhi, hadien wa pait ki thij pa thij da rai ki wow e yei hok man tre ri ya 14 ngut heiwa da e kti ya ka Certificate man tre ri cha kini.
Discussion about this post