Hadien wa dap chisnem i lai e dorkhat u Khroo Lamsalanki Pariat ha u CEM ka JHADC, u Thombor Shiwat wow dawa tipmit noh daka aiñ yong ka JHADC yaki jaitkur waphær waphær wa haap hapoh u pood u ang yong ka kamwa da e bor da ka riti synchaar ka ri India hapoh ka Sixth Schedule, neiliang u Khroo ynnin ka 15 tarik da lai pynkynmoo biang u ya u CEM wow smat chimkhia noh u ya kani ka kaam khnang wa ki jait kur waphær waphær u lait ki nei chah chim kabu ha kiwi tawon ki bru wa wan na baar.
Ong u wa i por dang biang ya u CEM kam u khlieh dooh ka Council wow leh u yeini i kaam iwa man kyrpang tam ya ka jait ka kynja yong waroh lang.
Ynnin ka sngi najrong i pynkynmoo dawa tipmit daka aiñ yaki jait kur waphær waphær, da ong haroh u wa emkaam yaka JHADC u tipmit u pynskhem ko leh ya i hiar ka jait ka kur na ka bei kawa pynman pynim ya ka jaitbru, ymtoh deiwa him na ka Bei Men namo na Men (ka bei u pa).
Dawa u leh yaka JHADC u tipmit ko ya kiwa yahkhmat ki Dorbar Chnong, ki Dorbar Kur namo ki Seiñ Kur, neitæ wa ya kiwa yahkhmat ka Dorbar Kur, Seiñ Kur kamwa tipmit ko ya u Dolloi, Sirdar wa u Waheh Chnong. Ymtoh de u tipmit namo u pyndap ya ki da ka Registration Society Act ka ri India.
I daw wa dawa tipmit yaki daka JHADC toh wa ki leh haap ki hapoh ka riti dustur ka synchaar khadar ya ki jait ki kur wa da sikai pateiñ wei toh u lait ki leh na ki dan (Tax) waphær waphær wa him na ki aiñ ka sorkar India.
Neitæ u tipmit ko yaki wah dei wow pynbha pynmiat chooh chooh kam yaka Kupli, ka Myntdu, ka Myntang, ka Umngot wa kiwi kam ki wah wa ki liar heh kiwa pynbiang um ya ki pynthor rep, kiwa pynbiang umbaam umdih, wei pynbiang bordiñ ya kiwa chong chnong.
Kamtæ yooluti u wa u CEM u smat pynkrehkaam u yeini i dawa i kyrpaad yong oo neibynta u im, u chngaaiñ ka jait ka kur wa imlang sahlang hi waroh kawi.
Discussion about this post