Ka Little Angels Secondary School kawa em ha Moosalyngkat, Jowai kam chibynta wow lehkmen ya ka Silver Jubilee ka skur, da pynman ko da ka Inter-School Marathon deiwa ya krehlang waka Diza’s Socio & Sports Club Jowai haka 25 tarik uni u bnai deiwa wan chibynta da ki khynnah kiwa boon ki skur.
Kani ka Marathon toh kawa jrong kamwa 6-7 Km wei da sdang ya ka na Umlidoh, Mihmyntdu wei da pynkut ha Little Angels Secondary School wei da man ko neibynta ki khynnah Class-VII hadooh Class-X.
Waroh ki skur wa da wan wow chimbynta da em ki ynru tylli wa kynthup ya ka Little Angels Secondary School, St. Mary Mazzarello Girls’s Higher Secondary School, Jowai, ka Marian Hills Higher Secondary School, Jowai, ka H.K. Singh Memorial Secondary School, Jowai, ka St. Michael & All Angels School, Jowai waka Ladthadlaboh Secondary School deiwa em waroh 38 ngut kiwa chimbynta.
Neibynta ki chynrang da yoh nyngkong u Willystar Pale, hei wa ar da yoh u Morningstar Phawa, hei wa le da yoh u Phas Phasi kiwa waroh na H.K. Singh Memorial Secondary School.
Ha ki kynthai won da yoh nyngkong da ka Dika Phawa na H.K. Singh Memorial Secondary School, hei wa ar da yoh ka Dalambhah Rymbai wei hei wa le da yoh ka Rapsakima Ksoo kiwa na St. Mary Mazzarello Girls’ Higher Secondary School.
Neiliang ka Principal ka Little Angels Secondary School da pynsñiaw ko yei kmen wa da yoh u pynman ya kani ka Marathon kam chibynta i lehkmen Silver Jubilee yow pynchlur yei chait i khiah kamjooh leh i yajan para khynnah skur deiwa em i ya krehlang hapoh ka imlang sahlang.
Ya kani ka Marathon da pynman leh deiwa ya krehlang wa ka yung krehkaam u SP ka West Jaiñtia Hills District, ka yung krehkaam u DM&HO, u District Sports Officer, ki bor District, ka Dorbar Chnong Moosalyngkat wa ki District Scouts & Guides Rovers yow pyntikna wa em i chngaaiñ ya waroh kiwa chimbynta.
Discussion about this post