Kamwa 1,600 ngut kiwa yaleh ya ka National Eligibility Cum Entrance Test (NEET) 2024 yow yoh thaw puræ ha ki Medical College da dawa ki wow yaleh biang ya kani ka Exam wei wow e ya ki da ki Compensation Marks, da pyntip ka National Testing Agency (NTA) kawa pynman ya kani ka Exam.
Kamtæ da pyntip wa da thung da ka High Power Committee yow pait ya waroh ini wa da ood da naam da kini ki 1,600 ngut heiwa ya ka Result kani ka NEET-UG dadep pynbna ha ka 4 tarik uni u bnai.
Kani ka Committee u pait ko leh yei chah pynbaad wa lait tooh ki Question Paper ha Bihar, i e Grace Marks i wym em pynbna chwa, i em kiwa boon bha kiwa yoh Marks da kiwa heh bha kamjooh leh yei em kiwa boon wa yoh Full Marks wei yei ku ki Cut-Off Scores.
U Director General ka NTA, u Subodh Kumar Singh hawa yaklam wa kiwa thoh khubor ynnin ka sngi da ong u wym em lait tooh ki Question Paper neibhah ini da poor i ha ki Social Media heipor 4:30 i sngi iwa man hadien ar kynta wa da sdang ka Exam wei da pyntikna u wym em wa jia wa ktah yei lai ryntih ka Exam.
Da khana u leh wa ha kani ka kynti em du iwi i “Question” wa ktah ya kiwa yaleh NEET ha uni u snem wei na ki 1,563 ngut kiwa da phah pait deiwi, 790 ngut da lait ki namo da Qualify ki wei waroh kiwa da Qualify da em ki kamwa 13 lak ngut wei kitu kiwa yoh Grace Marks ym em chah ktah manda kheiñ ya ka Percentage waroh kawi.
Waroh kiwa yaleh ya ka NEET ha uni u snem da em ki palat 23 lak ngut wei da em 13,373 ngut kiwa da wan chakhmat yow ujor ya iwi i Answer Key neibynta ka Physics neidaw wa phær ka kot warim wa kot thymme ka NCERT heiwa da chim noh ya ka rai wa kiwa jied yei jubab wa e katkam ka kot warim wa ko kot thymme u kheiñ bait toh iwa toh.
U Singh da ong u leh wa em du 1,600 ngut kiwa yaleh Exam ha ki 6 tylli ki Centre kiwa da chem chitom kiwa kwah u pynman deiwi heiwa waroh da em 4,750 tylli ki Centre.
Da pyntip u leh wa kani ka Committee wa thymme daw em ko hapoh u Chairperson warim ka UPSC uwa daw pait heiyatoh wow e Compensatory Marks wei neibynta ki khynnah kiwa chah pynsepai i por ki wei da booh leh ya kani ka Committee dei por wow e ko ya ka Report yong ka yow lait u chah ktah i leh Counselling wa Admission.
Da em leh kiwa da phah chithi wa da soi da palat 2000 ngut kiwa yaleh Exam kiwa da dawa wow pynman biang ya ka Exam wei kiwa da pynbaad leh da em boon ngut ware kiwa yoh Full Marks heiwa da em 67 ngut kiwa yoh 720 na 720 Marks iwa da yoo phylla bha neibhah ym jooh em jia kamni heiwa boon ki por da em 3-4 ngut kiwa yoh ya kani ka Perfect Marks.
Neiyatoh wa ki Grace Marks, u Director da ong u wa yeini u leh deiwa kheiñ ya kitu ki wym ye u pyndep ya ka Exam heipor neidaw wa chah pynsepai i por ki wei ya kitu kiwa kwah wow pynman biang ya kani ka Exam daw hap pait.
Discussion about this post