Ka Synjuk Waheh Chnong Ri Jaiñtia ha ka 8 tarik uni u bnai da pynsmai ko ya kiwa ksoh kaam wa thymme yong ka neibynta u snem 2024-2027 ha ka yalang wa da pynman ha District Library Auditorium, Jowai wa da wan sakhilang da u Kyrmen Shylla, Montri ka sorkar jylla uwa man leh u MLA ka Khliehriat kam u kongsan, neitæ u Finelyness Bareh, MDC Rymbai-Khliehriat uwa man leh u EM In-charge Political hapoh JHADC, hei emlang u Dolloi ka Elaka Jowai, u Puramon Kynjing, u J.L. Khongshei, Asst. Secretary Synjuk Nongshynshar Shnong Bri Hynniewtrep wa kiwi najrong ki waheh chnong na ki chnong waphær waphær ka Ri-loom Jaiñtia.
Ha kani ka sngi chim smai, u Arminius Lipon, Waheh Chnong ka Pynthorlangteiñ kam u President da yahkhmat u yei kyntien kular wei da bood won kiwi ki para dkhot wa kynthup nadooh ki Vice President kiwa man leh ki President yong ki Block Unit ha waroh ar tylli ki District kamjooh ki Joint Secretary kiwa man leh ki General Secretary yong ki Block ki Unit.
Neitæ u General Secretary ka Synjuk, u Kampher Pohlong, Waheh Chnong Amlarem, u Finance Secretary, u Tellme Phawa, Waheh Chnong Sabahmuswang, u Publicity Secretary, u Damon Dkhar, Waheh Chnong Modop Nartiang wa ki Life Member ka synjuk wa kynthup ya u Bishar Shylla, Treasurer, u Shelsing Langi wa u Nidamon Shullet kam ki Internal Adviser ka synjuk wa kamjooh ki dkhot Executive Committee na waroh ar tylli ki District.
Ha kani ka sngi neiliang u Kyrmen Shylla kam u kongsan kamjooh u Finelyness Bareh kam u symbood kongsan da e ki yei klam pyn-eh-daw pyn-eh-nasib ya kiwa ksoh kaam thymme ka seiñ wei kyntu ki leh ya ki wow kreh bha ki yei kaam khnang wa ka ri ka jaitbru u nang ku ko neipor cheipor.
U Kyrmen Shylla da ong u leh wa hei manbru wym hoi u man kiwa kwah bor palatpood namo u yoh lut ya waroh i bor ha kti, neibhah manda kamni ym ye u kreh bha yei kaam, kamtæ i dooh nong u man ya ki paidbah.
Tæ kamwa ki waheh chnong em ki ka bynta wa khroo ha ki chnong ki thaw kyntu haroh u wow man kiwa yakrehlang chirup chirup wa kiwa mihkhmat haka jylla, ha District Council kamjooh ki chnat krehkaam waphær waphær neibynta i myntoi u paidbah ha ki liang waroh.
Hei im næ i lai luti ki bru iwa bha wei iwa sih lai lang i chirup chirup tangwa chong hei pynemkaam næ i pyrkhat jar jiar, deiwa e nongmuna yei kaam tih mooyong wa em kiwa ong man iwa pynsih tangwa em won leh chiboon iwa bha wa mih lyngba ki krem mooyong deiwa pynkynmoo u ya u Dr. Kampher Pala uwa da yoh yei kyrdan Doctor toh lyngba i krem Mooyong, wei wot oo hi leh poi u hadooh ka kyrdan kamwa man katni toh na ki krem mooyong.
Heijooh i por kyntu u wow khih u kreh næ pynkrehkaam heitæ i rukom wym hoi u chah ktah ki pateiñ hadien.
U Finelyness Bareh ong u wa kam u MDC wa pait ya ka chnat Political, kyntu u ya ki paidbah ki waheh chnong wa ki Dolloi u man kiwa ya sñiawthooh yumut kiwa yakrehlang khnang yow lait u mih i kulmar neibhah ha ki 5 snem wa ksoh u ya ka chnat Political da boon ki ujor wa poi haka miej heiyatoh i kaam synchaar khadar ha ki kaam chnong kaam thaw.
Kiwi won wa klam kynthup ya u R. Hinge, Legal Advisor ka seiñ, u J.L. Khongshei, Asst. Secretary Synjuk Nongshynshar Shnong Bri Hynniewtrep wa kiwi kiwi.
Discussion about this post