Kam chibynta ka World Day Against Child Labour kawa ha ka 12 tarik, ka yung krehkaam ka District Legal Services Authority, West Jaiñtia Hills District chirup i yakrehlang wa ka yung krehkaam u Deputy Labour Commissioner deilang ka yung krehkaam u BDO Thadlaskein C&RD Block Thadlaskein, West Jaiñtia Hills, da pynman ki i pynsñiawthooh paidbah hajrong i hok yong ki khynnah kiwa hapoh 14 snem i rta, wa ymhoi u phah pynkreh ki ha iwon iwon i jait kreh.
U Legal Aid Counsel, u R. Lyngdoh hawa klam pynsñiawthooh hajrong ka phang “Child Labour (Prohibition & Regulation) Act 1986” da batai pynche u heiyatoh wa kani ka aiñ kawa khang pyrchah ya ki khynnah wow khih u kreh ha kiwon kiwon ki thaw wei lada chem ya kiwa pynkreh kamjooh ki bei ki pa wa chah ya ki khon u li khih li kreh, daw chah pynchitom ki katkam ka aiñ deilang i chah daiñ kuna.
Ka Labour Inspector ka West Jaiñtia Hills District, ka B. Toi hawa klam khana ko wa ka sorkar da pynkupbor ko ya ka chnat krehkaam yong ki wow paitsiar lada em kiwa phah pynkreh da ki khynnah wa hapoh 14 snem i rta yow pynngat ha ka aiñ ya ki tre wa pynkrehkaam wei wow e yada won ya ki khynnah.
I daw wa khanglaad toh neibhah dang toh i rta ki wow lai skur wei wa daw chah ktah ki hei bor i doh i pran, hei bor pyrkhat wa kiwi ki bynta.
Kamtæ kyntu ko ya ki manbei manpa wa hanla hapyrdi i dooh i duk leh toh u dohyap u pynlai skur ya ki khon khnang yow ku i manbru ki kamwa ka sorkar leh da pynbiang ko ya ki skur ha man ki chnong ki thaw hadooh wow pynbiang ja sngi.
Da pynrap haroh ko deiwa ong toh du i puræ puthi donhi wa ye u khanglaad yei dooh neibhah chisien wa da em i stat i tip han lym yoh kreh sorkar leh da tip da chemphang hi wow thooh dei khih i kreh wa rap biang.
Neiliang ka Secretary District Legal Services Authority, ka B. Majaw, MJS hawa pynsñiaw wa em ki Scheme yarap neibynta kitu ki khynnah wym yoh laad u lai skur, da pynrap haroh ko hajrong i emkaam wow e yada yei hok ki khynnah deiwa kyntu ya ki bei ki pa u pynchlur ya ki khon u lai skur ki, wei u li mih leh cha ka yung krehkaam ka District Legal Service Authority ha Khliehtyrchi neibynta u tip bniah.
Ha ka yalang wa pynlai da ka S.M. Saioo, Legal Aid Counsel ha Hall ka Thadlaskeiñ C&RD Block, da emlang leh ka Violet Rose Talang, Junior Development Officer, Thadlaskein C&RD Block office wa kiwi.
Discussion about this post