I yakhih pyrchah ya ka Dam kawa tip kam ka 11,200-MW Siang Upper Multipurpose Project (SUMP) dapoi chei wa joor ynnin i miet ha Pasighat, Arunachal Pradesh hadien wa kiwa pynman yakhih da thang ki ya ka yung krehkaam ka NHPC, kawi ka Police Station deilang ki kari pulit heiwa da chah leh pynsih ki yung ki MLA wa u State BJP President.
Ini da jia i kam chibynta ka khut khang chnong wa 12 kynta da ka Adi Bane Kebang United, ka SUMP Affected Area Youth Association, ka Siang Indigenous Farmers’ Forum Youth Wing wa ka Adi Galo Welfare Society ha Siang, Upper Siang wa East Siang District ka Arunachal Pradesh.
Kini kiwa pynman yakhih da dawa ki wow pynlait ya ki 10 ngut kiwa dadep chah kem, u thung biang ya ki waheh chnong kiwa da chah Suspend, u pynsangeh ya ka Pre-Feasibility Report (PFR), ki Survey wa kiwi de kiwa yatoh wa kini ki kaam najrong wow kyrriah ya ki bor chipai kiwa da phah cha kani ka thaw.
Kiwa chong chnong da slem pyrchah ki ya kani ka Dam deiwa tieñ ya hap yut chnong, i dooh noh ya ki thaw ki bhaw, ki thaw rap tangwa neiliang ka sorkar da ong ko wa da emkaam wow leh yeini yow pynlang ya ka um deiwa pyrkhat yeiwa chna Dam ka China ha Tibet ha kani ka jooh ka wah kawa tip kam ka Yarlung Tsangpo (Siang).
Kani ka pynkhang chnong da man ko kawa jai-jai heipor sngi ha Pasighat tangwa kat u poi i step synyaaw ka 24 tarik ha Dite-Dime hajan Geku ka Siang District, da em kamwa 150–200 ngut kiwa yakhih na Upper Siang (deilang ka thaaiñ Geku wa Komkar) kiwa da pyrhchang wow ku ya ki Barricade wa da booh ki pulit heiwa da em leh i ya kawang moo.
Neiliang ki pulit da siat ki da ki Tear Gas heiwa da mynsoo kamwa 4 ngut ki kynthai.
Hadien wa kut ka khang chnong heipor 5:00 waje i janmiet, kiwa pynman yakhih kiwa da khut ya idæ kam ki “Gen Z”, da pteiñ ki wow pynman yei khang chnong deilang ki luti syngkieñ wei ym bien ki wow mih nei thaw pynman yakhih hanla pyrchang ki Magistrate wow beh ki kamwa ar kynta, kamtæ da phah ki wow sait da ki Tear Gas.
Ki Video ha Social Medai da pynyoo ya ki bru kiwa kawang moo deilang ki pulit kiwa mynsoo chwa wow poi chei thang ya ki kari wa ka Police Station heipor 11:00 waje i miet ka 23 tarik iwa da pteiñ hadooh ka 24 tarik.
Kiwa mynsoo kynthup ki leh ya u Pasighat Deputy Superintendent of Police, u Tony Tatak, wei heini da chah thang leh ka NHPC Office ha ka thaaiñ High Region wa ka Police Station wa em ha kani ka thaaiñ, heiwa ki kari pulit wa chah thang da em ki hadooh 7-8 tylli.
Ki paidbah da lai ki leh wow leh pynsih yei yung u MLA ka Pasighat West, u Ninong Ering, u MLA ka Mariyang-Geku, u Oni Panyang wa u Arunachal Pradesh BJP State President (uwa jooh man leh kam u MLA warim ka Pasighat East) u Kaling Moyong. Ka Office ka Adi Bane Kebang leh da chah lute ko.
Kat u kieh 4:00 waje i step ka 24 tarik da ye wow pyn jai-jai yeiwa jia khlem da kem ya kiwon kiwon wei da em 8 ngut kiwa pynman yakhih kiwa da mynsoo maulu mala.
Discussion about this post