Ha iwi i jia wa yoo chyrkhei, uwi u bru da dung u ya u pa ka chan u hakhmat yong ka neidaw wa pyrchah u yei yalang chan ki.
Ya ini da em wa yoh u riñ Video iwa da jia ha Vijayawada, Andhra Pradesh hei miet ka 27 tarik uni u bnai wei da em wa booh ki ha ki rynsan Social Media.
Uni u bru uwa tip kam u Sivamanikantha uwa man kam uwa sikai Physical Education da dung u ya u Ramachandra Prasad uwa man kam u tre dukan dai mar baam deiwa sakhi ka khon u, ka Darshini kawa dang lai puræ Engineering wei ini i thaw wa jia toh iwa tip kam ki Brindavan Colony.
Katkam ka khubor wa da yoh, hei miet ka 27 tarik, u manpa waka khon u dang liwan yung ki na dukan da ka thuk-thuk heiwa u Sivamanikantha uwa da rieh hadien uwi u dieñ da yang khap u ki wei mar ya poi ki da ksoh u ya u manpa wei da dung u oo da ka tari boonsien bha katwa ka Darshini da kiat da pyrchang ko wow ksoh oo tangwa ym ye ko.
Hei khaddooh da ye ki bru paidbah wa yoo yeini wow ksoh ya uni u bru tangwa da yoh noh u wow yut, kamtæ da pynkit ya uni u manpa uwa da mynsoo bha cha Hospital tangwa da khlaad chwa u.
Uni uwa pynyap bru da sñiaw yei maham u ya ka chan u heini por wa jia wym toh u pynmih yei dur i dar yong ki wa em ki deilang ha Social Media.
Kini ki ar ngut da yalang chan ki la soo snem kattu hadien wa yachem ki ha Instagram wei da pteiñ ki wow ya lai lang hanla pyrchah u pa ka kynthai.
U pa kani ka kynthai da dep u wow yaklam yow pynsñiaw yei pyrchah u yei leh kini ki ar ngut deiwa ong wa toh u pynlut por ki hei puræ puthi wei ini da pynmih ko yei kynaad heiwa uni u manpa chisien da khut u da ka chnong wow pynman yalang ha yung u chan ka khon u yow yaklam chaphang ini tangwa ini da pynchrai chooh chooh ko ya u chan ka khon u.
Ki pulit da yoh ki wow kem ya uni uwa pynyap bru wei dang takit ki yow tip yei daw wa jia ini.
Ya ini Video ye phi wow pait heini ha wah:
Discussion about this post