Yoh ka Ri-loom Jaiñtia ya ka thaw e sikai Security Guard wa thymme 

Ka 6 tarik uni u bnai da man ko ka sngi wow sahkynmoo heiwa da yoh u wai ya ka Muksor Private Security Service (MPSS) kawa em ha Thadmuthlong-C, West Jaiñtia Hills kawa man ka thaw e sikai wow man kam ki khynroo khyllood kam ki Security Guard wei ya kani ka MPSS da chna ha i thaw wa heh kamwa 5 lak sqft wei da tipmit leh da ka sorkar jylla.

Ha kani ka sngi da em ka yalang heiwa u Addl. SP ka District, u H. Rymbai da man u kam u kongsan, u ADC ka District, u GH Passah da man u kam u symbood kongsan hei emlang ki waheh chnong na kylleiñ ka District wa kiwi kiwi.

Ya ka yalang da pynlai da u P. Muksor uwa man kam u Managing Director ka MPSS. 

U Waheh Chnong ka Thadmuthlong-C, u B. Tang da kyntu u ya i yakrehlang hapyrdi kani ka thaw sikai wa ki bor ka chnong kamjooh i ya burom markylliang.

U President ka Synjuk Waheh Chnong Ri Jaiñtia, u A. Lypon hawa e i klam da yaroh u ya kiwa sdang ya kani ka thaw e sikai wei da pynchlur u ya ki khynnah wow man kiwa emburom emakor.

U GH Passah hawa e i klam kam u symbood kongsan da ong u wa i kreh chitom yong ki khynnah ha kani ka chah hikai daw yoh myntoi hi ki.

U H. Rymbai kam u kongsan da ong u wa dap u dei kmen wow yoo wa em kam kani ka thaw ha ka District ka wow pynmyntoi ya ki khynnah khynroo ha kam kini ki sngi wa katni.

Da yaroh u leh ya u Managing Director kani ka MPSS, u P. Muksor uwa da ieh yei kreh pulit wow sdang u seiñ khih wei wow yarap e kreh ya kiwi tawon leh kamjooh.

Neiliang u P. Muksor da khana u wa ki khynnah wa dadep chah hikai katni da kreh ki ha kiwa boon ki thaw ha West Jaiñtia khamtam ha sor Jowai.

Chooh chooh da kyrpaad u ya ki paidbah kiwa emkaam ya ki Security Guard la ha ki thaw samen, ki Bank, ki yung krehkaam, ki bia, ki Fete wa kiwi ki kaam pynwyrngia wa ye ki u khut ya ka MPSS deiwa Phone ha u Number yon goo kam u Managing Director ka MPSS – 8787782592 næ ha u Advisor, u W. Phawa – 8132891490.

Kiwi kiwa da klam kynthup ki ya u waheh chnong warim ka Thadmuthlong-C, u I. Lyngdoh, u Vice President ka FKJGP-JH, u Wompher Wann, u President ka VDP ka chnong u Firstborn Sari, u OC ka Jowai Police Station, u S. Manner, u MDC warim u S. Tang wa kiwi kiwi.

Ya kani ka sngi da pynphooh da ki chaad wa ki rwai.