Ynne ka sngi ha i lehkmen lyngkhooh dap 11 snem ka M. Elizabeth School For Blind kawa man ka skur neibynta kiwa duna i bor ki khmat kawa em ha chnong Nangbah, da sakhi yei sap wa kyrpang ki khynnah puræ kani ka skur nadooh Class Nursery hadooh Class 8 wa hanla em duna ki hei bor chynna ki khmat leh tangwa ye ki wow sai wow pynyoo yei sap i phong yong ki nadooh i rwai, i chaad, i tem i put, i lehke Drama, i klam i khana wa kiwi de hadooh wym em u yoo phær ki na kiwa biang i bor khmat.
Ya kani ka skur da pait pynlai da ka Franciscan Sister Servants of the Cross, chirup ka Unity of Jyothi Seva Society. Wei ki khynnah wa puræ ha kani ka skur kynthup ki ya kiwa man kam ki Low Vision wa Totally Blind na kylleiñ ki chnong ka jylla Meghalaya.
Ha kani ka sngi lehkmen, ka Larishisha Suiam ka khon u Comingone Ymbon, MLA ka Raliang Constituency da man ko kam ka kongsan, u Moon Garod, Dolloi ka Elaka Nangbah kam u symbood kongsan, hei emlang ka Dapoilang Suiam kawa man ka kurim u MLA, u Rev Fr. Lesmon Nongtdu Parish Priest ka Nangbah Parish deilang u Asst Parish Priest, u Rev Fr. Alex, neitæ u Rev Fr. Simeon Sungoh Parish Priest Namdong Parish, ki Sister wa pait wa yoo ya kani ka skur, kiwa sikai, ki bei ki pa yong ki khynnah wa kiwi.
Ka Larishisha Suiam hawa pynsñiaw i kmen wow yoh u emlang ha kani ka sngi ong ko kani ka sngi ym du wow lehkmen ya ka lyngkhooh snem tangwa man ko leh ka sngi wow yoh u yoo yei kreh chitom, i jop wa i sap wa boonjait ha ki khynnah skur.
Neitæ da yaroh ko leh yei rai kut i kreh chitom kiwa sikai, ki Sister wa waroh kiwa embynta u kyntu kynrong ya kani ka skur.
Hawa klam e mynsien ya ki khynnah skur ong ko, “I man i long yong phi ym pynsakhiat ko uyi næ kayi wa daw man phi, i duna yong phi ym man wa da kut ka mynried, waroh na phi em phi ya iyi ræ iyi wa kyrpang u e cha ka pyrthai kamtæ toh u pynmankaam yeiwa thrang wa ya i stat i chemphang”.
“Teiñ teiñ ye ka imlang sahlang u ñiawpoh yei yi wa ye ki bru u leh du neidaw wa em i yaphær, tangwa i yaphær ym mut wa tlot bor, næ duna i hok, namo wa rap poh i kyrdan i emkaam,” da ong ka Larishisha Suiam.
Kyntu ko ya ki khynnah skur u lehbha ki hei puræ puthi wei u sñiawthooh leh yei sap wa em najrong wow em i sñiaw chaniah wei ymtoh leh u tieñ tangwa wow em i angnood wa heh.
Ka luti ye u man kawa saja man-i-por, tangwa u kynmoo wa kawon kawon ka luti wa khian wa da lai luti ye ko u yah cha ka mynried wa tyrchaaiñ.
Yaroh ko leh nadooh ya ka Principal, kiwa sikai wa kiwa kreh kani ka skur hajrong i kreh chitom ki palat yeiwa sikai ha kamra skur deiwa yarap ya ki khynnah u ku i sñiawskem, i sñiaw laitlooid, i stad i tip wa i pynchlur u mih cha ka pyrthai.
Yaroh ko leh yei e mynsien wei kyrchaan ki bei ki pa ya ki khon ki kti yong ki wa em duna hei bor ki khmat kamwa waroh ki khon emkaam ki u yoh i jooh i maya wei em ki leh jar jiar i ye.
Neiliang u Dolloi ka Elaka Nangbah kam u symbood kongsan yaroh u yei lai luti kani ka skur wei kmen u leh u yoo yei ku i roi ko na ki snem cha ki snem.
Kiwi wa e i klam kynthup ya ka Amabilis, ka Sister Fides wa kiwi.
Ha kani ka sngi neiliang ka kongsan wa u symbood kongsan da pynkup burom haroh ki ya ki khynnah skur wa poi chakhmat hei puræ puthi wa kamjooh hei yalehke Sports.
Neitæ najrong i chaad i rwai wa pynyoo sap kini ki khynnah skur da em leh ka lehke Skit wa yoosuk wa da chimbynta da ki khynnah kani hi ka skur wa da e pyrtuid “Beyond what eyes can see”.
Discussion about this post