Ka phlim wa e pyrtuid “Thma Tyllo” kawa da pynwandur wei pynmih da u Kiron Chyrmang uwa chong wa sah ha Lumchyrmang Mihmyntdu, West Jaiñtia Hills District da pynlait paidbah ya ka ha ka 6 tarik uni u bnai ha ka yalang wa da pynman ha Hall ka Lumchyrmang Mihmyntdu hei sakhilang u MLA ka Jowai, u Wailadmiki Shylla kam u kongsan, ki waheh wasian ka Lumchyrmang, ki paidbah kynthai chynrang, khynnah waheh wa kiwi wa chah khut sñiawbha.
U Kiron Chyrmang kam u Director wa Producer hawa klam ong u waroh u bru em ki jar jiar i sap wa e kyrpang u Blai wei ha oo hi samen sñiaw u wa iwon iwon wa leh u iwa ye u pynmih ja-kpoh katæ toh ka sap yong oo.
Heiyatoh waka sap chna phlim yong oo, ong u wym tip u mynnu u kut ko tangwa u pyrchang u lehbha katwa ye neibynta i myntoi yong ki paidbah wa pait kamjooh.
Iwa e mynsien ya oo wow chim ya kani ka luti chna phlim toh hadien wa dep thoh u ya kawi ka Drama, wei ya kani ka phlim da chimpor ya oo u thoh u kamwa 10 bnai, wei kat wym pu dep wym suk de i mynsien u, wei boonsien iwa thoh u nawa khyrngiat thiah chiteiñ synyaaw toh man i pasoh tam ha kani ka phlim.
U Wailadmiki Shylla hawa klam da yaroh u ya u Kiron Chyrmang wa hei rta wa dang khian ye u wow leh ya kani ka kaam neibhah du kat u chna Drama leh wym toh i kaam wa suk.
Neitæ i kaam wa da lai luti uni u khynroo pynyoo ko leh wa ka chnong Mihmyntdu kat nang lai ki por ki snem da nang ku nang ku ko ha ki bynta waphær waphær.
Heijooh i por leh kyntu u ya kiwi won ki khon khynroo khyllood wow chim kabu ki jar jiar i sap neibhah ka sorkar leh pynchlur bha ko deiwa e ki laad yarap waphær waphær yow ye ki u yieñ hei yong ki hi ki kjat la heiyatoh wei sap chna phlim kamjooh neibhah katni wa man iwa saja u yoh khih sorkar ha kini ki sngi.
Da pynkynmoo haroh u ya ki kabu wa ka sorkar da wai luti kyrpang ko neibynta ki khynroo khyllood kamjooh ki wym em khih em kreh yow sdang ki katkam i sap i ka’it yong ki lyngba ka Skill Meghalaya, ka Yess Meghalaya, ka Hello Meghalaya wa kiwi kiwi wa da pynkhreh ka sorkar.
Neiliang u Kiron Chyrmang pyntip haroh u wa kiwon kiwon ki bru wa kwah u pynyoo ya kani ka phlim ha ki chnong ki thaw yong ki ye ki u Phone ha kini ki Number-9863619152/8837443154.
Discussion about this post