Ka thaw e sikai wa tip kam ka Free Vocational Training Centre neibynta ka Assistant Masonry yow man kam ki mistri wa Assistant Electrician yow man ka kiwa chna ya ki kaam bordiñ, da wai ya ka ha chnong Moolamylliang (Saipung Block), East Jaintia Hills District.
Ya kani ka Training Centre da pynlai da ka Greta Solutions Training Academy, kawa em ka Centre Head ha Laitumkhrah Nongrimbah Road, Shillong wei da em ki Center yong ka leh ha Newhill Loom Sooiung, Jowai, Dkhiah East, Khliehriat deiwa ya krehlang waka Meghalaya State Skills Development Society (MSSDS) wei kamjooh leh waka Skill Meghalaya.
Kani ka Training Centre man ko neibynta kiwon kiwon ki khon khynroo chynrang wa khynthai kiwa chong chnong hapoh ka Saipung Block wa ye ki u wan yoh yei sikai kawa dei mynkna wei yow tip bniah yei phi u Phone ha ini i Number-6009897770.
Ha ka sngi wai ya kani ka Training Centre ha ka 5 tarik uni u bnai da em ka yalang wa pynlai da u Hermon Bamon, Assistant Waheh Chnong deiwa emlang u Apmon Pachiang, Waheh Chnong ka Moolamylliang kamjooh ka Baiakynti Rymbai na ka Greta Solutions, u Sonjoy Shylla, Centre Head Manager ka Greta Solutions Training Academy, Jowai wa u Lambormi Suchen, Skills Development Officer (SDO) West Jaiñtia Hills District wei da wan leh boon ki khynroo chynrang wa khynthai kamjooh leh wa ki manbei manpa ha kani ka yalang.
Neiliang u waheh chnong da khutlang wei da e mynsien u ya kiwa chong chnong wow chi kabu ki ya kani ka e sikai wa dei mynkna kawa daw e myntoi bha khamtam ya kitu kiwa pep skur chiteiñ por.
Neiliang u Sonjoy Shylla da khana u wa ka Greta Solutions Training Academy e sikai ko ya kiwa boon jait kam ka Street Food Vendor, Craft Baker, Assistant Masonry, Assistant Electrician wei da em boon ngut kiwa da yoh myntoi kynthai wa chynrang khamtam kitu kiwa pep skur chiteiñ por.
Da khana u leh wa kani ka e sikai ym emkaam u su iyi iyi leh wei manda dep ya ka Training daw e ka Certificate ryngkat wa ki tiar wei da em leh boon kiwa yoh kreh deiwa biang i su wei da ye ki leh wow yarap ya ka yung ka sem yong ki wei da em leh kiwa da ye u yieñ hei kjat yong ki hi.
Neiliang u Lambormi Sunchen da e u yei batai wa bniah chaphang ka Skills Meghalaya wa i yarap wa da ye u e cha ki wym em yoh kreh lyngba ki Skill Training waphær waphær wa da e dei mynkna wei kani man ko du neibynta kiwa dadap 18 snem chaneiñ kamjooh kiwa chong chnong wa pura ka Meghalaya wa ye u chimbynta ha kini ki e sikai.
Discussion about this post