Thung dieñ wei lai sumaar ka Sarot I Man ya ki dieñ wa dadep thung

Hanlada ka World Environment Day dadep ko nadooh ka 5 tarik u bnai wa dep, neiliang ka Sarot I Man ym em u chong ngiah ko yei thung dieñ. Kamwa kani ka seiñ yong ki chilok na ka chnong Panaliar da jooh ong ko wym myntoi wow thung hi-eh ya ki dieñ, lada ym ri ym sumaar ya ki. Kamtæ ynnin ka 7 tarik, ka Sarot I Man da lai pynkhooid biang ko ya ki tre dieñ wa dadep thung ko na ki snem nachwa.

Heini i lai pynkhooid dachem wa ki dieñ da heh da san ki dei sumaar ki dkhot kiwa da lai pynkhooid kamwa ar sien chi snem wei ha kani ka jooh ka step da thung biang sa 20 tre ki dieñ ha Kiang Nangbah Memorial Park, Treriat ka Kiang, Pynthorwah Panaliar, Jowai.

Chwa wou thung ya ki tre dieñ, da em chwa ka yalang tbian wa pynlai da u Ram Sumer, weiwa da yoh ya i klam tbian na u Jait Dao Sumer, kiwa man ki dkhot ka seiñ.

Kam ka dak wow paan ya i kyrkhu na ka Bei Ram-aw yoh u bha u miat ka pyrthai myndær yoh u heh u san ki dieñ wa dadep thung; da yoh ya i ngoohblai na u Shape Paswet, dkhot ka seiñ.

Related posts

Siat ka Pakistan ya ka skur wa pynlai da ki Nun hadooh wa yap ar ngut ki khynnah

May 9, 2025

Phah ka Pakistan 300-400 tylli ki Drone yow siat ya ki thaw wa em ha India, pyntip ka sorkar

May 9, 2025

Hei klam u Jait Dao Sumer, da khana u wa kani toh ka sien ka wa le wa ka Sarot I Man da lithung dieñ ko, heiwa ki dieñ wa thung ko leh daheh dasan ki. Da ong u wa da sdang ya ka World Environment Day nadooh u snem 1973, dei chynna jngai ki bru chemphang næ ki stat pyrkhat wa kammon u yada ya ka Ram-aw na i jæd i pai yong ka. Da e nongmuna haroh u wa ha ka chnong Jowai yong i dahi chiboon chah ktah ka Ram-aw wa ki tawiar soodong yong ka. Da ong haroh u wa wot ya u loom Mooliksoo leh katni da sdang wow pyndooh ya oo uwa man u loom wa e la-ær, wa e um ya ki chnong wa harood yong oo. Kamtæ da kyntu u ya waroh wow pyndooh pyndam ya iwon iwon i wow pynsih ya ka Ram-aw.

Ka Sarot I Man da e khublei ko deiwa kyrpang ko ya u Eddy Murphy H. Passah uwa da e sñiwbha ya ki tre dieñ khlem da chim iwon iwon. Da e khublei haroh ya ka seiñ wa man ka tre thaw, ka Jaiñtia Iasiat Khnam Memorial Society wa da chah ko wow thung dieñ hei thaw yong ka, heijooh i por ka chnong Panaliar kam kawa pait wa yoo ya ki thaw ki bhaw hapoh u pood u ang yong ka.