Ka St. Mary Mazzarello Girls Higher Secondary School Jowai kawa da seiñ da sdang wei pynlai da ki Sister Salesian nadooh u snem 1926, ha ka 30 wa 31 tarik u October da pynkut noh ko yei lehkmen dap 100 snem i lai luti yong ka hei wow e i chakri lyngba i stat i tip hapoh Ri-loom Jaiñtia.
Ha ka sngi pynkut kawa man ha ka 31 tarik, u Vincent H Pala, MP warim ka Lok Sabha uwa man leh u President ka Catholic Association yong ka Shillong Archdiocese da man u kam u kongsan, u Father Ferdinand Dkhar, Bishop Jowai Diocese kam u symbood kongsan hei emlang ka DSEO ka West Jaiñtia Hills, ka Wa-I-Sa Sumer, ki Father, ki Sister wa em ha ki kyrdan wa ki kaam waphær waphær neibynta u chakri ya ka Balang wa ka imlang sahlang, ki khynnah skur warim, kiwa chah khut sñiawbha wa kiwi.
U Vincent H Pala hawa klam ong u, “Kani ka sngi ymtoh du kat u lehkmen yei dap 100 snem i lai luti wa i chah chitom ka skur wow e chakri hei puræ puthi, tangwa ka 100 snem man leh i sah kynmoo ha ki pateiñ wa da lai wa kiwa daw wan. Ka pyrthai kylla ko tangwa i yoo jngai ka chlem puræ neibynta u e i stat i tip ya ki khynnah skur wei wow tei yei im i manbru wa bha u nang pteiñ e mynsien ko”.
E yaroh u leh nadooh ki Sister wa pait ya kani ka skur kamjooh waroh kiwa embynta u pynlai bait wa kynthup ya ka School Managing Committee, kiwa sikai, ki khynnah skur warim wa kiwa katni hajrong i ku smat kani ka skur ha ki liang waroh.
Yaroh u yei bynta i kreh chitom kiwa sikai hajrong kammon u pynwandur yei puræ puthi, i rukom im ki khynnah nadooh dang khian, yooluti u wow nang kreh chitom chooh ki chaphrang khlem da pyrkhat du neibynta ka tulop, kamwa ha ki 100 snem wa da lai kani ka skur da pynmih ko chiboon kiwa stat wa chemphang wa da kreh haki bynta waphær waphær.
Kyntu u ya ki manbei manpa wow yakrehlang ki chirup wa kiwa sikai neibhah waroh ar em ki ka bynta wa kongsan hei wow pynku yei puræ puthi ki khon.
Neibynta ki khynnah won ong u, “I wan yong phi heini ym du u yoh yei stat i tip, tangwa yow tip leh yei tynre, i akor burom wa kiwi ki jait sikai neibynta i manbru wa bha wa miat”.
Heiwa yooluti u leh wow poi ki cha ka kyrdan ka naam wa rap chakhmat hei im.
Heijooh i por yaroh u ya ki Missionary wa yoo jngai ki hajrong i emkaam u pynkupbor ya ki kynthai deiwa seiñ ya kani ka skur wa kyrpang neibynta ki kynthai khnang yow yoh ki yei sikai wa kyrpang.
Katwa neiliang u Father Ferdinand Dkhar, Bishop ka Jowai Diocese hawa klam ong u, i poi ki Salesian Sisters ha Jowai ha u snem 1926 da man i kyrkhu ya ka Ri-loom Jaiñtia khamtam ha Jowai, ong u wa hanla heiwa sdang maad ki chiboon iwa eh wa khor leh tangwa dei kreh chitom yong ki yoh u yoo yei man i long kani ka skur kamwa man ko katni.
Da e khublei haroh u ya waroh ki Sister, ki Principal, kiwa sikai, ki khynnah skur warim kiwa da kreh chitomlang hei wow pynku ya kani ka skur.
Chwa ini da yoh yei klam tbian hajrong i lai luti ka skur na ka Sister Theresa Phawa, Principal St. Mary Mazzarello Girls Higher Secondary School Jowai, i duwai wa kiwi.
I pynkut yei lehkmen ha kani ka sngi da man kawa yoo phooh yoo phieñ wei yoo chongkun bha lyngba i chimbynta ki khynnah skur ha ki jait pynka-it kasar waphær waphær nadooh i chaad i rwai, i leh Karate, i leh March Past wa kiwi de.
Discussion about this post