Dawa paan maap u CEM ka JHADC na u Organising Secretary ka VPP

U Chief Executive Member (CEM) ka Jaiñtia Hills Autonomous District Council (JHADC), u Thombor Shiwat da ong u wa i pynbaad wa murieh ya ka poisa ka Council kawa Rs. 20 klur da u Organising Secretary ka Voice of the People Party (VPP), u Damewanhi Rymbai toh kawa bakla wei ka wym khlem yurim iyi iyi.

“Uni u Organising Secretary ka VPP, da thaad u yei burom wei pyrtuid yong nga samen waka Council, wei toh u paan maap paidbah u hapoh chi tayaaw hajrong ini i pynbaad wa khlem yurim yong oo, lym kamtæ nga ym yohsa O wow lai katkam ki luti yong ka aiñ,” da ong u CEM deiwa pynrap wa kani ka poisa toh ka poisa ka JHADC hi (Council Own Fund).

“Ha kam kani ka pyrthai wa da che katni iyi u murieh hawa i yoh poisa i da khana wa ka sorkar da pynlait ko ya ka bhah poisa wei iyi em hok u wow tuklar yei krehkaam yong ki. Ki paidbah da jied ki ya i wei daw pyndep i yei hok wei kaamram wei daw pynlai ya ki kaam ki jaam ka Council wa da pynkit ha i,” da ong chooh chooh u CEM.

Da ong u leh wa ka Council ym em chong klikti ko wei yasaaid ko neibynta wow yoh pynmih ya ka tulop kiwa kreh ka Council wei ka poisa wa yoh na ka sorkar leh toh ka bhah ka Council hi wei da mang wow su ya ka tulop kiwa kreh da ki klur du neibynta chi bnai, kamtæ ka Treasury leh ym ye ko wow pynlait kattæ ya ka poisa waroh, da ong u CEM wei kamtæ i pynbaad uni uwa yahkhmat ka VPP ya kawon kawon ka kaam toh u pyrkhat kam uwa da heh wei ymtoh ka rukom wow klam khlem ki sakhi satar wow pyndooh burom ya kiwi.

Related posts

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Da 4 lak tam ki Vote jop ka Priyanka Gandhi ha ka Election wa nyngkong yong ka

November 23, 2024

Neiliang ka Secretary ka Executive Committee ka JHADC, ka B. Bamon, da ong ko wa waroh tip ki wa ma muna tangka ka Council da stang bha ko wei kawon kawon ka poisa wa yoh u pynlum pynlang da pynlai cha ka tulop.

Ka poisa wa da yoh lum na ka sorkar jylla dang ini wadep wei kamjooh ka Rs. 20 klur toh ka poisa wa da yoh u lum ka Council (Council Own Fund), wei i pynbaad wa murieh u CEM da ka VPP toh iwa bakla wei ym em i pynemkaam bakla ya ka poisa yong ka Council, da ong ka Bamon.

Da pynrap leh wa nadooh ki sahep wa ka EC waroh kawi kreh chitom ki miet wei sngi wow yaleh yow pynyoh tulop wei hadooh kattæ da ye u su ar bnai ka tulop wei daw su pynlait sa chi bnai.

Puræ leh: Kyrpaad ka VPP ya u CEM ka JHADC wow pynche ya ka Rs. 20 klur tam ka poisa