U MDC ka Congress na Mylliem, u Ronnie V Lyngdoh da khyrwait u deiwa eh yei leh arsap ka Voice of the People Party (VPP) du wow yahbakla ya ki paidbah ri Khasi-Jaiñtia.
Hawa klam ynne ka sngi wa kiwa thoh khubor, u Ronnie da ong u wa ka Voice of the People Party (VPP) da dawa ko wow pyndam noh ya ka District Council ha ka jylla deiwa dawa ya ka Article 371 tangwa kani ka jooh ka seiñ u yaleh Election MDC ko.
Hawa pynsñiaw yei sñiaw sier lada krehkaam ka Article 371 ka riti synchaar ka ri kamwa da dawa ka VPP, u Ronnie da ong u wa ki District Council ym ye de ki wow krehkaam lada pynkrehkaam ya ka Article 371 wei sa iwi toh wa ya ka jylla Meghalaya da pynlait na ka Panchayati Raj neidaw wa em ka Sixth Schedule tangwa lada dawa Article 371, ka Panchayati Raj daw krehkaam ko namo ym em wei kini toh ki yukylli.
Da ong u wa ka Panchayati Raj toh ka rukom synchaar cha ri thor wei ym em krehkaam ko ha Meghalaya neidaw wa yada ka Sixth Schedule tangwa lada krehkaam ka Panchayati Raj, ki dorbar hima, dorbar chnong, ka rukom synchaar paidbah tynre daw kut noh ko chisiendon wei ha ka Panchayati Raj daw em ka Election heiwa kiwi ki jaitbru ye ki wow chimbynta ha ka synchaar khaddar.
Discussion about this post