U Montri Rangbah, u Conrad K Sangma da ong u wa katkam ka kyndon ka Inter-State Migrant Workmen Act, 1979, ka kuna ya u Contractor u wym bood ya ki kyndon hawa wanrah ya kiwa mylla na baar man ko du Rs. 5000 wei kani man ko katkam ki kyndon wa da chna ha jylla.
Tangwa katkam ka kyndon ka sorkar pyrdi won, u Contractor ye u wow chah kset patok hadooh chi snem hawa ym bood ya ki kyndon ka aiñ.
U Conrad da ong u wa kani ka kuna man ko kawa duna bha wei ka sorkar daw bichaar biang ko ya kani ka kyndon.
Katkam wa ong u Conrad, ka aiñ Inter-State Migrant Workmen Act, 1979 ymtoh du wow Register tangwa kiwa kreh mylla leh daw yoh myntoi ki hawa Register ki ha ka chnat Labour.
Heijooh i por da pyntip u wa da pynche cha kiwa yahkhmat ka Khasi Students Union (KSU) wym em i kyntien Work Permit ha ka aiñ Inter-State Migrant Workmen Act, 1979 tangwa du wow booh pyrtuid namo wow leh Registration.
Da khana u wa da yaklam leh yow pynkhlan ya ka aiñ ya ki bru kiwa wan na baar wa toh u pynbiang ya ki kot ki sla wei neiliang ka sorkar daw pyrkhat bniah ko yeiwa wa da tyrwa ka KSU.
Heijooh i por da ong u wa da em 10 tylli ki ujor mukotduma ya kiwa yahkhmat ki seiñbhalang. Da ong u leh wym ye u sylli u kynreh ya uwon uwon wei kiwa leh pyrchah, ka aiñ daw leh ko ya iwa emkaam.
U Conrad da ong u wa ka aiñ Meghalaya Resident Safety and Security Act (MRSSA) 2016 da krehkaam ko tangwa man ko kawa rap suki.
Da khana u leh wa ya ka Committee leh da chna ha ki chnong ha Shillong wei i pynpsiah pyrtuid ya ki bru leh dang lai ko tangwa da pdiang u wym em smat ini waroh.
U Montri Rangbah da ong u wa da klam u leh wa u Montri ka chnat kaam pohyung ka ri, u Amit Shah hajrong ka Inner Line Permit, ka ktien Khasi wa Garo wei kamjooh ya ka aiñ MRSSA wei ka sorkar jylla da pynche ko chaphang ka MRSSA katkam ka Article 19 wa da kylli ka sorkar pyrdi.
Discussion about this post