Uwa yahkhmat ka Liang Pyrchah, u Dr. Mukul Sangma da ong u wa daw thoh u cha u Prime Minister ka ri India yow kyntu ya oo wow chimkhia hajrong i pynbaad wa da mih pyrchah ya u Symbood Montri Rangbah, u Sniawbhalang Dhar wa da emkti u ha ki kaam pyrchah aiñ iwa yatoh wa i drugs wa i khayi mooyong.
U Dr. Mukul da ong u wa ka sorkar pyrdi toh u chimkhia ko hajrong ini i chah pynbaad khamtam neidaw wa i kaam tih mooyong ymtoh iwa haap hapoh ka sorkar jylla, wei lada em iwon iwon i leh pyrchah aiñ man ko iwa tyngkheiñ ya ka Section 21 yong ka aiñ MMDR Act.
Chooh chooh da ong u wa i pynbaad wa yoh poisa lyngba i drugs toh kawa hap wow husiar bha neibhah da sakhi ha ki laad pathai khubor ha waroh kawi ka thaaiñ North East yei yoh kem drugs kawa dapoi da ki spah klur, wei ka sorkar pyrdi hap ko wow chimkhia ya ini i chah pynbaad wa khia bha.
U Dr. Mukul da ong u leh wym ye wow pynbaad hi-eh wei utæ uwa pynbaad leh wow suki noh u, tangwa toh u lai chakhmat. Chooh chooh da ong u wa waroh ki arliang toh u em ki yei kitkhlieh wei lada chim ki yei kitkhlieh daw hap wow thoh cha u Prime Minister ka ri yow pynyoo yeitæ wa chah pynbaad wei toh u chimkhia yei kaam.
Kam wow pynkynmoo wa u President ka Meghalaya Pradesh Congress Committee (MPCC), u Vincent H Pala ini wadep da pynbaad u wa u Sniawbhalang Dhar emkti u ha ki kaam pyrchah aiñ kam hei drugs wa u mooyong wei da kam u leh wa ki File ya ki kaam u Sniawbhalang Dhar da em ki ha ka miej yong ka CBI.
Discussion about this post