Ka Elaka Narpuh Youth For Change ka seiñ wa dang dep pynmih hapoh ka Elaka Narpuh kawa pait yei bha i miat ki khon khynroo ka Elaka Narpuh, da pynsñiaw ko yei pyrchah joor ya ka Public Hearing ka Star Cement Meghalaya Ltd yow paan bor tih moochuni kawa da tip kam ka ‘Brishyrnot Limestone Deposit –II’ kawa em ha chnong Brishyrnot, Elaka Narpuh, East Jaiñtia Hills.
Ki daw wa pyrchah toh wa kani ka thaw tih moochuni toh kawa heh hadooh 65 Hectare ha Brishyrnot wei jngai ko du 20-30 meter na ka wah Lunar.
Da ong leh wa kani ka karkhana toh ka wym em e kreh ya ki tre chnong tre Elaka wei kiwa yoh kreh leh toh du kitu kiwa yajan wa ki tre kani ka karkhana tangwa ym yoh da ki kreh wa heh kyrdan lait na ki Grade IV kam ki Cleaner, Peon, Gardener, Driver hanla da em ki tre chnong kiwa da pyndep kreh Engineer, M.Com wa MBA najrong wa da em ka kular wow e kreh 60% cha ki tre chnong wei kamwa man kattæ ki tre chnong yoh kreh ki 20% katwa kiwa na baar won 80%.
Da ong leh wa i wan kani ka karkhana da man pathan kam i tim ya ki khon ka Elaka Narpuh kawa kamai spah donhi wei ym em burom ko ya ki tre chnong.
Chooh chooh da ong wa kini ki karkhana wa em ha Elaka Narpuh khamtam ka Star Cement toh kawa pynphiah ya ka imlang sahlang yow suk ki u yoh yeiwa kwah ki.
Najrong ini lada e laad wow tih moochuni daw ktah ko leh ya ka wah Lukha khamtam ka Narpuh Wildlife Sanctuary kamjooh ya waroh ki doh um wa ki mrad khloo.
Kamtæ ka Elaka Narpuh Youth For Change da pyrchah joor ko ya ka Public Hearing ka Star Cement kawa daw pynman ha ka 08-10-24 heipor 11:00 waje i step ha Brishyrnot wei da khut da wer leh ya ki paradoh para snaam khamtam ya ki paidbah ka Elaka Narpuh wa ki seiñbhalang kiwa em ha Ri Khasi Jaiñtia wow pyrchah joor ya kani ka Public Hearing ka Star Cement khnang wym man i tim ya ka pateiñ wow wan.
Discussion about this post