Ynne ka sngi ka Jaiñtia Hills Autonomous District Council (JHADC) da yoh ko wow wai noh ya ka Jaiñtia Durbar Hall kawa em ha Stand Jowai-Shillong, Loomsooiung, Jowai.
Ha kani ka sngi wai da em ka yalang wa pynlai da ka Secretary ka EC ka Council, ka Barcelona Bamon heiwa u CEM ka Council, u Thombor Shiwat da man u kam u kongsan hei emlang u Dy. CEM, u Lasky Rymbai, u Phasmon Dkhar, EM ka CWD wa kiwi ki MDC.
U Phasmon hawa e i klam da ong u wa i kreh ya ini i yung toh iwa da sdang da slem bha wei ha kani ka Executive Committee wa katni da ye wow pyndep i kreh heiwa da e khublei u ya u Contractor, u BP Najiar uwa da kreh pyndep ya ini i yung.
Da e khublei u leh ya ki sahep wa kiwi kiwa kreh ka Council kiwa da kreh khlem chong wow pyndep smat yei kreh ya ini i yung.
Neiliang u Lasky Rymbai da ong u wa ini i yung daw pynmyntoi bha i ya ki paidbah ka Ri-loom Jaiñtia waroh kawi wei ynne u man ko ka sngi ka wow sahkynmoo.
Da ong u wa kani ka yung toh kawa da yooluti da slem bha ka wow yoh u phyllu yumut ha i kaam synchaar ha ki Elaka wa ki Sirdarship deiwa kyrpaad ya i yakrehlang yong waroh heiyatoh wa i pynkrehkaam ya ini i yung.
Chooh chooh da ong u wa deiwa em i hapoh ka Sixth Schedule da lait i na ka Income Tax wei ka District Council man ko kam ka stieh wow yada na ini, wei kreh ka JHADC neibynta i yap i im ka jaitbru na Ri-loom Jaiñtia.
U Thombor Shiwat kam u kongsan ynne da ong u wa ini i yung ym yoodur wow man iwa thymme tangwa nei pyrkhat ka EC da rai wow wai bait ya ka khnang wow lait ki bru u pyntaroi ya ka deiwa booh ya ki bru wa yang ha ini i thaw.
Da ong u wa ini i yung da sahteiñ i da boon tylli ki EC wa nachwa tangwa kawa katni, ynne da ye ko u wai noh ya ka.
U Thombor da khana u wa kani ka Scheme wow chna toh lyngba ka 13th Finance ka sorkar pyrdi iwa man wa da slem bha neibhah katni da poi ka 16th Finance deiwa e khublei ya kiwa kreh ka Council khamtam ka Civil Works Department hapoh i pait u EM, u Phasmon Dkhar wa da ye u kreh pyndep ya ini i yung.
Chooh chooh da ong u wa heiyatoh wa ka Council katni da yakrehlang, da ap yei pynsñiaw wot ya iwa e yumut ki MDC na ka Liang Pyrchah la ha iwon iwon i kaam neibynta i bha i miat.
Heijooh i por da ong u wa waroh chi kattu jooh paan ki Dolloi wow yoh ya i thaw krehkaam yong ki wei ha ini i yung daw ye ki kattu wow pynemkaam ya ini yung hawa em ki ha Jowai wei ka EC daw pyrkhat ko leh neini heiwa kammon u ye u pynemkaam ya ini i yung.
Ha ka yalang da yoh ya ki kyntien pdiang burom na u Lotcifer Ryngkhlem, Secretary ka District Council katwa ya ki kyntien khublei da yoh na u Rambih Challam, Asst. Chief Engineer, JHADC.
Discussion about this post