Ka chnong Dawki kawa man kawi na ki chnong wa pawnaam ha thaaiñ War Jaiñtia kawa em ha khappood Bangladesh, da man ko kawa da kyrkhu bha nei kai ka Wah Umngot wei da em ko leh kiwa chong chnong na kiwa boon ki jaitbru deilang ki niam.
Ha uni u snem ki Hindu na ka chnong da lehkmen ki leh ya ka Durga Puja ha Shri Shri Maa Sarbamangla Sarbajanin Kali Mandir.
Iwa phooh kani ka Puja ha uni u snem toh i dap 75 snem ha kani ka kynti i lehkmen ha kani ka Mandir.
U Kamalendu Chakraborty uwa man u President ka Mandir da ong u wa ya kani ka Mandir da chna ha u snem 1928 dei yung tin namo Assam Type wei kat dang lai ki por ki bru najan chnong kam na Muktapur, Bakur, Tamabil wa kiwi da wan ki wei da chna dei yung khyndaw-bilat ha u snem 1977.
Da pyntip u wa ya ka Durga Puja heini da sdang wow pynman nadooh u snem 1951.
U Miton Das uwa man u Secretary ka Puja Committee da ong u wa ka Puja ha uni u snem u sdang ko nadooh ka 17 tarik uni u bnai wei u kut ko ha ka 21 tarik heiwa boon ki bru najan chnong wa wan cha ka Puja nadooh na Pyrdiwah ha East Khasi Hills wa kiwi kam na Amlarem wa kiwi de.
U Pronoy Sangma uwa man u Member ka Committee da ong u wa ini i dap 75 snem pynyoo i yei mynsien maya niam ki bru deiwa pynrap wa da chna ya ka Mandir da ki Bengali wa ki Nepali.
Discussion about this post