Pyndep kiwa seiñ khih yei chah sikai ha Community College Wahiajer

Ka NEHU-Deen Dayal Upadhyay Community College for Skill Development, Wahiajer kawi na ki chnat yong ka North Eastern Hills University (NEHU), da pynman ko ya ka e sikai wa soo sngi lynter hajrong ka phang “Entrepreneur Development” neibynta ki khon khynroo khyllood kiwa thrang wow tia chaphrang ha ki kaam wow seiñ khih seiñ kreh, hajrong ka thong wow e i sneiñ yow tip rap bniah hajrong ki sap waphær waphær heijooh i por wow e yarap wow pynkylla yei rukom pyrkhat deiwa thymme khnang yow poi ki cha ka thong i jop.

Kani ka e sikai da khriñ ko ya chiboon ngut kiwa chimbynta na kylleiñ ki thaw waphær waphær wei ya ka yalang pynwai da pynman ha ka 31 tarik u Naichiphaw, 2024. Da yoh leh yei sikai wa bniah bha na ka bru chemphang kam na ka Jacqueline Nongkhlaw, Director, PNB, Rural Self Employment Training Institute (RSETI), East Khasi Hills District, Meghalaya.

Ya kani ka e sikai da ye u pynman deiwa chimkhia wei kyrchaan u Prof. Prabha Shankar Shukla, Vice-Chancellor yong ka NEHU wa ka Prof. S.M. Sungoh, Principal (I/c) yong ka DDUCC.

Neiliang u Vice-Chancellor da ong u wa da leh yeini dei bahkhlieh wa khroo ka University hei wow kyntu ya ki bru wa thooh ki laad ki luti kammon wow ye ki u seiñ khih pyn ya idæ deiwa man kiwa yatylli wow wanrah yei rukom pyrkhat wa thymme khnang wow ye i u lai chaphrang.

Related posts

Da sdang ka WWIII ong u heh chipai warim ka Ukraine

November 22, 2024

Chah kyrriah u SP ka Ri-Bhoi District

November 22, 2024

Da pynsñiaw u leh yei kmen wa kam kini ki e sikai e ki i yada wa ki laad yarap ya ki bru hei wow kyntu yei kaam wa yatoh wa i yoh i kot yong ka ri.

Ha ka yalang pynwai da em chirup wa u Associate Prof. Dr. David Pyngrope, uwa man leh kam u Public Relations Officer (PRO) yong ka NEHU, Shillong, kam u kongsan uwa da ong wa kiwa seiñ khih toh kiwa ye u wanrah ya iwon iwon wa thymme, khnang wow poi cha ka thong yong i jop. Wei yow poi chei jop hap u lai luti chiboon i eh, i dooh mynsien wa i chah rem, kamtæ hap u man kiwa yaichah kiwa kreh chitom khang wow poi i cha ka thong.

Ya ka yalang da pynkut da ki kyntien e khublei na u Wolnish Rymbai, Programme Coordinator wei da saam leh ya ki Certificate cha kiwa wan ya chimbynta.