Ka Khasi Students’ Union lyngba ka Employment Monitoring Cell da phah dorkhat ko cha u Symbood Montri Rangbah, u Prestone Tynsong uwa pait leh ya ka chnat Home (Police) hajrong i wym bait i rukom thung kreh ha ka Directorate of Prosecution wa pynman da ka MPSC.
Ka seiñ da ong ko wa ki paidbah hi ym sñiaw phylla de ki yeini i leh khalær i rukom thung kaam thung jaam lyngba ka MPSC wei ini daw pteiñ daw jia i kat wym pu pynkylla yei rukom krehkaam ka MPSC.
Ha kani ka kynti da khut yaleh kreh ha u snem 2023 neibynta 6 tylli ki Post yow man kam ki Asst. Public Prosecutor heiwa ya ka Result hadien wa dep pynman Interview da pynbna ha ka 29-10-24.
Katkam ka Advertisement uwon uwon wa yaleh hap ki wow man kiwa da kreh namo kiwa em Experience la le snem iwa mut wa toh u man ki muktiar kiwa da yasaaid ha yung bichaar ym duna ya ka le snem wei toh man kiwa da yaleh ya ki mukotduma wa tyngkheiñ aiñ (Criminal Case).
Tangwa iwa phylla won wa chem ka seiñ toh na kiwa da mih pyrtuid hadien wa dep pynman Interview ym em man ko kam ki kyndon heiwa da em uwi uwa dang pyndep yei puræ puthi ha u snem 2023 wei ye u man u wym pu ye u pyndep tang ya ka All India Bar Examination (AIBE) kawi na ki Exam wa ki Lawyer hap ki wow pyndep hadien wa da yoh ya ka Law Degree yow ye u yoh License yow yasaaid kam u muktiar ha yung bichaar.
Kamtæ ka seiñ da ong ko wa i chah jied uni pynyoo ko wa em iyi ræ iyi cha kylla wei ka MPSC da pynkheiñ hi ko pyn ya ki kyndon wa ka da booh ko.
“Hawa ym pynkrehkaam ya ki kyndon iyi i myntoi wow booh hawa kiwa dang dep Pass leh ye ki wow yaleh,” da ong ka seiñ.
Hajrong ini, ka seiñ da dawa ko wa ka Home (Police) Department wa toh u pynbait ko yei kynrum kynram yow jied ya ki bru kiwa toh hok u yoh.
Discussion about this post