Mih kulmar ha yung dorbar ka J&K hadien wa wanrah ya ka rai wow pynim biang ya ka Article 370

Ka yung dorbar ka sorkar ka Jammu and Kashmir ynnin da pdiang ko ya ka Resolution wow yaklam wa ka sorkar pyrdi wow wanrah biang ya ka Article 370 yow pynkupbor biang ya kani ka Union Territory kamwa jooh man nachwa wow man ko kawa kyrpang.

Hadien ini da pynsangeh ya ka dorbar da kamwa chi kynta hadien wa mih i awri na ka Liang Pyrchah wa em ka BJP, kiwa da pynjæd ya kani ka Resolution.

Ya ka Resolution kawa da klam yei sñiawkhia yeiwa pyndam yei man kyrpang ka jylla da pdiang khlem em i yania neibhah u Speaker da ap u yei kyrchaan hapyrdi i awri.

Kani ka Resolution toh kawa wanrah da u Deputy Chief Minister, u Surinder Choudhary wa u Minister ka National Conference, u Masood uwa da wanrah wa ar ya ka.

Related posts

I phah wan pyntipmit ya ki Kur ha ka Council toh wow pynneh ya i hiar pateiñ wa i rukom im

November 7, 2024

Rs. 54 lak tam yoh dan ka JHADC na ki yaaw ko ha ka chi snem tam

November 7, 2024

Ka Resolution da ong ko leh wa ka dorbar sñiaw ko wow pynman kyrpang biang ya ka J&K katkam ka Constitution ka ri wow yada yei man kyrpang i rukom im ki bru yong ka.

Da kyntu leh ya ka sorkar pyrdi wow sdang yaklam wa ki bru wa da jied wow pynman kyrpang biang ya kani ka Union Territory katkam wa angnood ki paidbah.

U Leader of Opposition uwa man u MLA ka BJP, u Sunil Sharma da pyrchah u yeini deiwa ong wa ym emkaam u yañia ya ini i kaam neibhah wa da em i ha i klam u Lieutenant Governor chwa wow sdang ka dorbar.

Chooh chooh da ong u wa ini man i i kaam wa da leh sya tangwa ympoi i katchawa em neibhah i rai wow pyndam ya ka Article 370 toh iwa da chim da ka Parliament kawa man kawa khlieh dooh ha ka ri.

Hapoh ka yung dorbar da mih i awri wa heh hadien wa ki MLA ka BJP da pyrchah wei da tia ki cha khmat ka yung dorbar tangwa da chah pynsangeh noh ki ha ki Marshall.

Ynne i step leh mar ya sdang biang ka yung dorbar, ki MLA ka BJP da sdang biang ki wow pyrchah heiwa 3 ngut ki MLA da chah rah ki cha lait deiwa phah u Speaker, u Abdul Rahim.

Heipor wa u Sunil Sharma dang klam u, ki MLA ka Awami Ittehad Party deilang wa u MLA u Langate Sheikh Khursheed da kynthiar ki cha khmat ka yung dorbar deiwa rah Banner wa toh ki kyntien pynim biang ya ka Article 370 wa 35A heiwa ini da pynchrai ko ya ki MLA ka BJP kiwa da kynthiar leh yow lai chim ya kini ki Banner yow pynjæd ki.