Ynne ha ka Dorbar Tlang ka JHADC, neiliang u MDC ka Liang Pyrchah, u Brightstar Chyrmang da wanrah u ya ka Motion wow yaklam hajrong i slem wow yoh ya ki Land Holding Certificate, Patta wa kiwi ki kot na ka Revenue Department wa Land Settlement & Land Records Department.
U Brightstar da ong u wa da yoo u wa boon ki paidbah ood ki yeini i chimpor wow leh ya ki kot ki sla hapoh ka Council wei ym du oo tangwa waroh ki MDC leh chem ki yeini wa wan ki paidbah na jar jiar ki Constituency yong ki chirup wa ki kot ki sla wa pynyoo wa chimpor wow yoh ya ki Land Holding, ki Patta wa kiwi ki kot thaw wa emkaam.
Da ong u wa emkaam u pynthymme ya i rukom krehkaam ka Council ha kini ki ar tylli ki Department deiwa pynemkaam ya ki stat ka juk wa katni.
Da kyntu u leh ya ka Council wow pynsmat ya ki kaam leh kot wot hadooh i kajiak thaw leh neibhah wa em ki Court hapoh ka Council neibynta ini.
Neiliang u Andrew Shullai da ong u wa lada ym em wa klam hapoh Council tip mynnu u lai Survey ka Council ya ki thaw ki bru wei yeini klam ma klam bait ki paidbah.
Chooh chooh da ong u wa i dooh tulop kiwa kreh wanrah i yei slem u pyndep ya ki kot ki sla ha ka Revenue Department.
U Andrew da kynmoo u leh ya i por nachwa heipor wa man CEM u heiwa da jooh Scan ya ki kot wa ki Map yong ki thaw wei mar ya Click da chem wot ya ki ymtoh kamwa katni wa chimpor u thooh ya ki kot ha ki File.
Heiyatoh wa i kajiak thaw da ong u wa lada jia wym wan ki manda lai pynbait thaw toh u e rai wot khnang wow dep smat i kaam wei lada em ki wym hun ye ki wow lai cha ki kasari wa heh.
U CEM hajrong ini i bynta da pynche u wa em jar jiar ki EM ha jar jiar ki Elaka wei ka Elaka wa pait u toh ka Elaka Nartiang wei heitæ ym slem ware u leh ya ki kot ki sla.
Da kubur u leh yei tlot i krehkaam kini ki ar Department ka Council deiwa kyntu ya kiwa kreh wow kreh hok ki neibynta ki paidbah.
Hadien ini neiliang u Brighstar da kyrpaad u ya ka Council wow chimkhia yeini neibhah kreh ki heini toh neibynta ki paidbah deiwa pyndam noh ya ka Motion.
Discussion about this post