Hadien wa yoh i kyrpaad na ki kattu katni ngut ki manbei manpa yong ki khynnah skur ki wym pu yoh Scholarship ha ki skur waphær waphær, neiliang ka HANM West Jaiñtia Hills hapoh i yahkhmat u President, u Wankishwa Mawlong deiwa ya krehlang wa ka JYF Jowai Circle hapoh i yahkhmat u Clifford Shylla President, ha ka 12 tarik uni u bnai da lai yachem ki wa ki kattu katni tylli ki skur heiyatoh wa i wym yoh u Apply Scholarship ki khynnah skur neidaw wa khlem yoh u psiah hapoh ka Portal na ki daw wym ye wow pynbiang ka skur ya ki kot ki sla wa emkaam hajrong ini.
Neiliang yong kiwa yahkhmat yong kini ki seiñ da ong ki wa kawi na ki skur ka wym pu yoh Scholarship toh ka St. Paul English Secondary School Mookaswan, West Jaiñtia Hills.
Da pyntip ki wa hawa yaklam wa u Principal yong kani ka skur, da ong u wa neidaw wa dang chimkti wot u ya ini i kaam, da em chiboon ki bynta wa hap pynthymme wei heiyatoh wym pu yoh Scholarship ki khynnah, da ong u wa neiliang ka skur daw pyrchang ko wow leh yeiwa emkaam khnang yow man iwa kyrkhu ya ki khynnah kani ka skur.
Kiwa yahkhmat ki ar seiñ da kyrpaad ki leh ya ki skur waphær waphær ki wym pu yoh Scholarship wow sñiawbha ki wow pynbiang ya ki kot ki sla kiwa emkaam khnang wa kiwa lai skur u yoh ki wow yaleh ya ki Scholarship kawa man kawi ka laad yarap ya ki ha i puræ puthi yong ki.
Discussion about this post