Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

U Chief Minister ka jylla, u Conrad K Sangma ynne da wai u ya ka 6th Helicopter & Small Aircraft Summit 2024 ha Courtyard, Marriott, Shillong heiwa ya kani ka Summit da pynman da ka Pawan Hans Ltd. wa ka FICCI deiwa kyrchaan ka Ministry of Civil Aviation chirup wa ka sorkar jylla wow pynyaar ya i pynemkaam ya ki Helicopter wa ki lieñsuiñ khian ha kylleiñ ka ri.

U Conrad hawa e yei klam da e khublei u ya ka Ministry of Civil Aviation wa da jied ko ya ka Shillong wow pynman ya kani ka Summit neibhah wa man ko ka thaw wa kyrpang neidaw wa daw pynemkaam ya ki lieñsuiñ wa khian.

Da ban joor u wa ymtoh wow kyruiñ chei wow pynyabi ya ki jylla ka thaaiñ Northeast samen khlem da kyruiñ ya ki ri wa em wa em chajan ka India namo ki ri ka South East Asia.

U Conrad da ong u hawa hær na Shillong cha Dhaka chimpor i hapoh 30 minit, na Shillong cha Bangkok kamwa chi kynta khatsan minit neibhah boon ki nongbah ki ri wa em ha South East Asia jan ki wa ka Shillong bar wa ka nongbah New Delhi kawa chimpor ar kynta chiteiñ.

Related posts

Pynbna ka VPP ya ki kyrtong MDC ha ka JHADC wa KHADC

November 13, 2024

Kyntu ki seiñ ki jaitbru ri-loom ka Manipur wow dam u chibynta ha ka Election District Council

November 13, 2024

Kamtæ da ong u wa dang jan ya i wow lai na Shillong cha Vietnam, Laos, Cambodia, Burma, Nepal, Bangladesh, Bhutan wa kiwi ki thaw.

Chooh chooh da ong u wa emkaam wow pynyaar ya ka Act East Zone, wei emkaam u chynna jngai ya kani ka thong krehkaam khamtam wow pynku ya i kaam uiñke suwari, i yarap hei sumaar, i khayi pateiñ wa kiwi ki kaam wa yatoh wa i kamai i yoh i laa.

Heiyatoh wa i pynyabi lyngba ki lieñsuiñ, u Conrad da ong u wa ka jylla Meghalaya emkaam u chim kabu ko ya kini ki laad ki luti deiwa kyntu ya kiwa embynta ha ini i kaam wow kyrchaan ki ya ka sorkar ha kiwa boon ki rukom.

Da sñiawkmen u leh ya ka UDAN Scheme Version 5.5 neibynta ka Seaplane wa ki Helicopter neibhah wa kani ka Scheme man ko kawa emkaam bha ya ka Northeast waroh kawi.

Heijooh i por da ong u wa nachwa chimpor ko hadooh 20 kynta wow lai na Shillong cha kiwi ki jylla tangwa katni won deiwa em ka UDAN Scheme i por wow lai da tbian bha i.

U Conrad da e khublei u leh ya ka Ministry of Civil Aviation khamtam ya u Montri yong ka, u Kinjarapu Rammohan Naidu, wa kiwi kiwa da embynta ha ini i kaam.