Ynne ka sngi, 90 ngut ki pulit na ki jylla ka thaaiñ North East da pyndep ki ya ka e sikai namo ka Training na North Eastern Police Academy (NEPA) deiwa pynman da ka Passing-Out Parade kawa tip leh kam ka Dikshant Parade.
Na kini ki 90 ngut, da em 27 ngut ki Deputy Superintendent of Police (Dy. SP Probationers), 2 ngut ki Inspector, 56 ngut ki Cadet Sub-Inspectors (SI) wa 5 ngut ki Cadet Assistant Sub-Inspectors (ASI) na Meghalaya, Manipur, Assam wa Nagaland.
Kini kynthup ki ya 6 ngut ki Dy. SP wa 40 ngut ki SI na Meghalaya, 14 ngut ki SI na Assam, 13 ngut ki Dy. SP wa 6 ngut ki SI na Manipur, 8 ngut ki Dy. SP wa 3 ngut ki SI na Nagaland.
Ka Training ya kini ki pulit da sdang ko na ka 4 tarik u Kmaichonglad (Dec) 2023, wei u sdang kreh ki nadooh ynne ka sngi heiwa u Chief Minister ka jylla, u Conrad K. Sangma da man u kam u kongsan.
U Conrad da yaroh u ya ka NEPA kawa da chakri ya ka thaaiñ ha ki 46 snem wa dadep heiwa da em hadooh 36,088 ngut kiwa da chah hikai.
Da kyntu u ya ki pulit thymme wow chakri dei sñiawthooh yei sñiaw kiwi kamjooh wow man kiwa jemnood hawa em ha i kreh wei wow em i bahkhlieh ya ki kaamram wa da e kti.
Ya ka Parade ynne da yahkhmat da u Dy. SP Probationer, u D. Theingam Thangal yong ka Manipur Police Service heiwa da pynyoo kammon i akor wa i chah hikai wa yoh ki na ka NEPA.
Ya ki kyntien kular da yahkhmat wow e da u Danesh Rana, uwa man u Director ka NEPA.
Ha kani ka sngi da em leh ki heh sorkar wa ki heh pulit na Assam, Meghalaya, kiwa chah khut sñiawbha wa kiwa ha-yung ki pulit kiwa chah hikai ha ka Explosives and Bomb Disposal Course wa ki Training of Trainers (ToT) wa Program on Disaster Management.
Discussion about this post