Ka yaaw yadai yathied wa tip kam ka Buyers & Sellers Meet 2024 kawa le sngi da sdang ka ynne wa pynman da ka yung krehkaam u Deputy Commissioner, West Jaiñtia Hills District ha madan Jrisaleiñ, Chutwakhu, Jowai hajrong ka thong u pynku ya ki bru ka thaaiñ waka jylla heiwa da wan chimbynta chongchit da ki paidbah na ki chnat krehkaam sorkar waphær waphær, ki Village Organisation, ki bru samen wa kiwi kiwi de.
Ha kani ka yaaw da em hadooh kamwa 120 tylli ki dukan wa da booh kiwa dai nadooh ki mar rep wa dang dep khait, kiwa da pynrkhiang, neitæ ki tiar nadooh ki that ki sula wa pna chna pna thaaiñ hi ki, ki jaitbam jaitdih waphær waphær wa chet hi da kiwa dai neitæ em leh ki thaw wa khana ya ki jait laiñ puræ puthi, kamjooh ki laad yoh khih yoh kreh.
Da em leh i pynyoo yei sap tem sap rwai, i chaad tynre wa kiwi.
Ya kani ka yaaw yadai yathied da wan wow wai da u MLA ka Jowai, u Wailadmiki Shylla chirup i emlang u DC wa SP ka West Jaiñtia Hills District u B.S. Sohliya wa u S. Syrti, ki sahep sorkar waphær waphær wa kiwi.
U Wailadmiki Shylla hawa klam ha ka yalang wai da ong u kamwa kani ka yaaw yadai yathied toh ka rynsan neibynta u pynku ya ki warep, ki bru em sap wa ya ki khon khynroo khyllood yoh ki u tip ya ki laad yoh khih yoh kreh, kamtæ da kyntu u wow yachem yumut wei saam kylliang yei tip i stat, wei toh u man leh kiwa pdiang sñiawbha dei dur khmat wa sooh rkhai ya ki bru wa wan mih ha ki dukan yong ki.
Kyntu haroh u ya ki khynroo khyllood u chim kabu ki ya ki laad ki Scheme wa wanrah ka sorkar khnang yow ye u pynku yei khih i khan, la neibynta wow sdang yieñ hei kjat yong idæ.
Kamtæ yooluti u wa kani ka yaaw yadai yathied ha kini ki le sngi u man ko kawa pynmyntoi ya ki paidbah wa dai tiar kamjooh kiwa wan thied.
Discussion about this post