Kiwa chong chnong khamtam ki khynroo ka Lumshnong da pynsñiaw ki yei chrai yei pynlait tdem iwa da pyllat na ka karkhana ka Star Cement wa em ha Lumshnong kawa da leh yeini man-i-por.
Ha ka khubor wa da phah, da ong wa kani ka karkhana ym kheiñ de ko iyi iyi leh ya kiwa chong chnong wei kamjooh ya ki kattu katni tylli kiwi ki chnong wa em chajan kiwa da chah ktah ha ini i tdem.
Da ong leh wa kam ki khynroo ka chnong, dadep maham deiwa e dei thoh cha katai ka Company ha ki kajiak bnai wa dadep wym toh u pynlait tdem deiwa yoo chyrkhei tangwa kani ka karkhana ym ap ko.
Da kylli leh wa lada ini i tdem wa da pynmih ym ktah ko mo yei chait i khiah ki bru wei ym em laad mo wow khanglaad wow pynmih hadooh kat deini i tdem wei wow leh heitæ i rukom wym ktah yei riñ mynsien ki bru.
Kamtæ da ong wa ini i rukom leh kani ka karkhana pynyoo ko yei yoo beiñ yoo poh ko ya ki paidbah wa chong chnong wa ya ki para marjan chnong neibhah i tdem da hær i kylleiñ kylleiñ wei da ktah leh ya kiwi ki chnong wa marjan.
“La kat deini yoh kani ka karkhana wow leh katwa ngait mut i wa ka Pollution Control Board yoh thiah ko wei lada kamni ym tip de iyi wow jia,” pynkut ka khubor.
Discussion about this post