U Chief Minister ka jylla, u Conrad Sangma da ong u wa ynne man ko ka sngi wow sahkynmoo heiwa kam kiwa mihkhmat da hun mynsien bha ki neibhah kam u khlieh ka sorkar da yoh u booh ya u mooyurim yong ka Integrated Health Centre, u pait ya ka Iawmusiang Market Complex, ka thaw siat suloi, ka Thadlaskein Hospitality Complex wa kiwi de.
Da ong u wa ki Block Office man ki kiwa emkaam bha i wow myntoi ki paidbah heiwa da rai wa waroh ki 56 tylli ki Block u em ki ya ki yung krehkaam yong ki hi.
Chooh chooh da khana u wa 6 snem nachwa da kwah u wow chna pynmiat ya waroh ki LP School ha ka jylla weiwa da khyrngiat u wa kynjoh i lut hadooh Rs. 3,000 klur, heitæ da rai wow sdang u chna pynmiat ya ki kajiak chisien deiwa pynrap wa da ye u wai kajiak chisien nadooh ki skur, ki Block wa kiwi.
Da khana u wa ha ki 8 snem wa da lai da sakhi chiboon i kylla nadooh ki yalehke Sports, ki C&RD Block wa kiwi khamtam wow wanrah ya ki kaam pynroi heiwa da chna ya ki thaw sumaar dei yooluti wow yada yei mynsien wei da chna ya ki thaw puræ khanng wow ye u pynmih ya ki khroo pyrkhat ha ka imlang sahlang.
Da ong u wa ha ka chi snem wa dadep ka sorkar da phah ko Rs. 400 klur cha ki khynnah kam ka Scholarship khnang wow myntoi ki wow ye ki wow pyndep yei puræ yong ki.
U Conrad da khana u wa heipor wa yaklam wa ka Doctor ha West Khasi Hills da khana ko wa em ki manbei wa wan na ki thaw wa jngai wei ym em ki tang kam ki yulum khon heiwa heitæ da rai wow sdang ya ka Mother Kit deiwa e cha waroh ki manbei wa kha khon nadooh ki sula ka bei, i khon, ki kymmor, i sabon wa kiwi wei ini pynman i yeitæ i kylla.
Ya ki khynroo da ong u wa ynne da lai u ch ka Shooting Range heiwa da booh ya ka na ka sorkar heiwa da chna ya i yung Shooting Range, da e ki suloi, ki pistol iwa da ye u yarap ya ki khynnah wa kiwa yalehke wow yakhun ki ha ka National wa State Level.
Da khana u ya i daw wa sdang e tiar yarap seiñ khih hadien wa chah hikai ki khynnah khynroo khyllood ha ki kaam wow yoh khih yoh kreh heiwa ka sorkar da pynlut ko hadooh Rs. 50 klur wow thied ya ki kor soor, ki tiar chet, ki tiar mistri wa kiwi de.
Da ong u wa nachwa ka sorkar khut ko ya ki waheh chnong, ki Dolloi wa kiwi tangwa katni ka sorkar da kynthup ko ya ki wow embyntalang ki ha ki kaam wa kreh ko.
U Conrad da ong u wa nachwa ki sahep ka sorkar pyrdi jooh danda ki dei kheiñ kom wa ymye ka Meghalaya u leh iwon iwon tangwa kamwa man katni ka sorkar da raikut ko wow pyndep ya iwon iwon iwa nachwa ymye ko wow leh.
Hajrong iwa kyrpaad u MLA ka Jowai, u Wailadmiki Shylla, u Conrad da ong u wa ymye u kyntait tangwa daw pait kammon wa ye u leh.
Discussion about this post