Ym em wa tam yei yatoh parabru yow ye u pynbait pood: Rakkam

U Montri wa pait yaka chnat Border Area Development, u Rakkam A Sangma da ong u wa i pynbait pood hapyrdi ka Meghalaya waka Assam daw lai ko, tangwa i yatoh parabru toh u man ko da kawi ka rukom.

“Ym em de da kawi ka rukom pynbait pood bar yei yatoh parabru. Sñiaw O wa i yatoh parabru ym em ko ya u pood u ang, hanla u pood i khyndaw em u,” da ong u Rakkam.

Da ong u leh wa ki ar tylli ki jylla, ka Meghalaya waka Assam toh u pynlai ki chakhmat yow pynbait ya u pood kiwa dang sah haka kylla kawa ar neibynta ki 6 tylli ki chong ha khappood kamwa dadep u pynbait ya 6 tylli ki chong haka kylla wa nyngkong ha kini ki snem wa da lai.

U Rakkam da pdiang u leh wa i pynbait pood da sangeh chwa ko ya kattæ neibhah wa boon ki daw, khamtam wa ha Meghalaya wa daw em i pynkhreh ya ka Election, tangwa da pynrap u wa ka sorkar hapoh i yahkhmat u Montri Rangbah, u Conrad K Sangma da kut yumut ko wow pynbait ya ini i eh i khoo.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Da ong u wa ki Regional Committee da pynkhreh ki ya ki Report yow e noh cha ka sorkar neibynta yow pynlai chakhmat yei pynbait pood ya ki 6 tylli ki thaw wa dang sah haka kylla kawa ar.

“Hao em sakhiat i eh, tangwa kam u Montri nga kwah O wow kyrpaad ya ki paidbah wa chong chnong ha khappood, deiwa burom yei eh wa maad phi, wei man iwa emkaam u em i yatoh parabru, deiwa imlang hapyrdi i suk i kmen, neibhah ym em de da kawi won kawa ye wow pynbait ya u pood wa rap bha yeini,” da ong u Rakkam.

Ha kawi won ka liang, u Montri da khana u wa ka sorkar da jooh yoh poisa ko naka sorkar pyrdi yow yoh u pynkrehkaam ya ki Scheme pynroi ha khappood, tangwa kattæ la 3-4 snem da sangeh ki u e poisa, wei katni ka sorkar da pyrchang ko na ki Scheme yong ka hi yow yarap ya ki paidbah ha khappood heiliang i kaam pynroi.

“Nachwa da jooh yoh i yaka mang poisa naka sorkar India, tangwa ha kini ki 3-4 snem da pynsangeh ki, ym tip bha oo lada daw sdang biang ki nadooh uni u snem wei dang yang i wow tip. Hao neiliang ka sorkar jylla wot lada ka mang poisa man ko kawa duna leh, tangwa i leh ya ki Project kiwa khian wa khian kiwa yatoh wa i kaam pynroi,” da ong u Rakkam.