Hadien wa ka chnong Tangnub, East Jaiñtia Hills District da lai li tia ki cha ka yung krehkaam ka JHADC haka 10 tarik uni u bnai wow pynsñiaw yei rai wa kam ka chnong da chim ko heiyatoh wow dam lai thap Vote namo wow Boycott ya ka MDC Election myntu u snem heiwa da rah lama rong yong, rah Placard kamjooh i kbai kyrha, kamtæ haka 13 tarik uni hi u bnai da pynskem chooh chooh ko ya kani ka rai deiwa li booh da ka chithi ha JHADC.
Katkam ka chithi wa da thoh ki cha u CEM ka JHADC da ong ki i daw wa chim ki ka rai wow Boycott ya ka Election myntu u snem toh neidaw wa ka Delimitation Committee da lehbeiñ ko yaki deiwa kyrriah noh cha ka Saipung Nongkhlieh Constituency, heiwa ini i kyrriah ym yahaap de katkam i rukom man ki thaw ki bhaw (Geographical Area) kamtæ ki paidbah wym em hun ki yeini.
Da ong haroh ki wa haka 01-04-24 dadep e ki dei thoh ki cha ka Delimitation Committee lyngba ka Joint Petition deilang waka chnong Lelad wow pynneh ya ki haka 25 Sutnga Nongkhlieh Constituency, wei haka 18-07-24 da e Memorandum ki leh wow pyrchah yaka Delimitation Committee heiyatoh i kyrriah yaki chnong napoh ka 25 Sutnga Nongkhlieh Constituency.
Tangwa khyrngiat won ki wa hadien i pyrchah ki, yaka Lelad da pynneh biang haka 25 Sutnga Nongkhlieh Constituency, katwa yaka Tangnub da rah bait cha ka Saipung Constituency.
Wei neidaw wym yoh ki leh u yachem paan pynche na u CEM hajrong ini i chah kyrriah, da pynman yaka dorbar chnong haka 9 tarik uni u bnai wei da chim ki ka rai u dam lai chimbynta wow dam u thap Vote haka Election MDC myntu u snem.
I pyntip na u waheh chnong ka Tangnub, u Alfund Sutnga.
Discussion about this post