Ka chnong Panaliar, Jowai haka yalang yong ka, kawa dangdep chong, da pyrkhat sani bha ko heiyatoh waka Election MDC cha JHADC ka wow man ha u bnai wow wan.
Ka chnong hi ym em u khanglaad næ pyndooh ko ya ka hok laitlooid ki kyrtong, tangwa ka booh ko ki kyndon, ki aiñ chnong neibynta wow khanglaad yei sih i roi, u yoh ya i chongsuk chong chngaaiñ wa i khooid i pliah, heijooh i por u yohlaad kiwa chong chnong u yachimbynta ha ki yalang wow pynman da ki kyrtong waphær waphær.
Kamtæ, kamwa jooh pynman ko nachwa ha ki Election wa dadep, heini leh, ki jooh hi ki kyndon u pynsñiaw ko, kamni ha wah:
Da khang pyrchah ya kiwon kiwon kiwa mih wa psiah chapoh ka chnong Panaliar wow leh khlemakor yeiwa dabooh charood luti syngkieñ næ u pyntaroi deiwa noh yei jhep næ kiwon kiwon ki tiar wa dadep pynemkaam ki.
Khang pyrchah wow lai miet, wow uiñ miet næ lisaam poisa cha kiwa chong chnong hapoh ka chnong.
Du chisien donhi ye u pynman yalang ya kiwon kiwon ki kyrtong neibynta ka Election.
Da khang pyrchah wow leh Decoration næ pynriam ya ka Yungwalieh wot ka Stage leh kamjooh. Ymchah leh wow e cha hapoh Yungwalieh ka chnong.
U chah du 10 ngut donhi deilang wa u kyrtong wow psiah chapoh ka chnong heipor wow pynman yalang. Da chah leh du ar tylli ki kari khian wow wan cha ka yalang. Ka chnong daw e ko da ki Badge.
Uwi donhi wow klam hachwa yong u kyrtong ha ka yalang. Ym chah won u yabeiñ kynnoh ya kiwi.
Kiwon kiwon ki Party Unit kiwa kwah u pynkup burom ya u kyrtong yong ki, toh u paanbor chwa ki chisngi hachwa ka yalang na u waheh chnong ka chnong, lym kamtæ ym chah ya ki wow leh yeini. Ka chnong ymchah ko ya ki bru samen wow leh yeini.
Da khang pyrchah ya kiwon kiwon ki kyrtong wow pynman yalang cha ki chnong næ dong wa chajan ka chnong Panaliar, wow phah pynyieñ kari chapoh u pood u ang ka chnong, heijooh i por ymchah ya kiwa wan yalang yong ki wow li uiñ limih lipsiah chapoh u pood ka chnong.
Ka chnong Panaliar kyntu ko ya waroh ki kytrong wow ya ksohktilang wa ka neibynta i bha i miat ha waroh ki liang. Maham joor ko wa lada em kiwa pynkheiñ ya ki kyndon yong ka wa ye ki u chah pyndooh u man yalang næ ye u chah pyndam ka yalang lada heipor wa da sdang.
Ka chnong pyn-eh-bok pyn-eh-nasib ko ya ki kyrtong dei kyrkhu kyrdoh, yoh ki u ye u pyndep ya waroh iwa da mang ki hei lailuti yong ki.
“Hao, hei yaleh wym jop waroh, han kattæ leh, ka chnong ong ko; waroh ki kyrtong lada uwa jop næ uwa rem leh, toh ki yong ka. Ka chnong emkaam ko yei yakræhlang yong waroh neibynta ki thmu wa bha yong ka haka imlang sahlang,” pynkut ka kyrwoh na ka chnong.
Discussion about this post