Ka Meghalaya High Court da pyndam ko ya ka Case POCSO pyrchah ya u bru na West Garo Hills uwa bia wa ka kynthai hadien wa heh ko wei da phah ko ya ka sorkar wow e yarap ya kani ka bru wa i khon yong ka.
Ha ka hukum wa pynmih ha ka 18 tarik uni u bnai, ka Chief Justice Revati Mohite Dere da pyndam ko ya ka FIR wa Register ha Tura Women Police Station ha u November 2020 kiwa yatoh wa ka mukotduma ha Special POCSO Court ha Tura.
Kani ka Case toh ka yong u Sayedullah Hoque (26 snem) wei kani ka kynthai da em ko 19 snem katni. Kini ki ar ngut da man ki kam ki chijur ha u 2019 wei da bia ki ha ka 15 tarik u November 2025 hadien wa kynjoh kani ka kynthai 18 snem i rta wei da yoh khon kynthai ki ha ka 24 tarik u June 2026.
Chwa wow pynmih ya ka hukum, ka High Court da paan ko ya ka bui na u Secretary ka High Court Legal Services Committee wa ka Tura Women Police Station wow kylli lada kani ka bru bia ko dei ngait yong ka.
Ka bui da ong ko wa kini ki chijur da sah ki chirup wei da em ki ya ka khon heiwa ka kynthai da kwah ko wow pyndam noh ya ka FIR.
Kamtæ da hukum ko ya ka District Child Protection Officer wa ka Secretary of the District Legal Services Authority, Tura wow kyrchaan ya kani ka kynthai wa i khon wow yoh myntoi ki na waroh ki Scheme sorkar hapoh phra tayaaw.
Kini ki Scheme kynthup ki ya ka Meghalaya Victim Compensation Scheme, 2022, ka POCSO Victim Support Scheme hapoh ka Nirbhaya Fund, Meghalaya Health Insurance Scheme, Ayushman Bharat-PM-JAY wa kiwi kiwi.
Ka High Court da ong ko ya ka poisa yarap toh u booh ha ka Fixed Deposit kat hadooh wa kynjoh ka kynthai 25 snem wei daw ye ko u yoh ya ka sut man ka le bnai kat hadooh wa kynjoh ko yeitai i rta.
Da phah leh wow e ya ka Compliance Report ha ka High Court wei u chong bichaar biang ko ha ka 3 tarik u February 2027.





Discussion about this post