Ujor ka VPP pyrchah yei thmu ki chnong wow booh da ki Common Platform yow yalap Election MDC

Ka Voice of the People Party (VPP) da lai booh ko da ka ujor ha u Commissioner & Secretary ka District Council Affairs (DCA) Department, yow pyrchah deiwa ong wa em ki waheh chnong hadooh ki sordar kiwa booh kyndon yow khang yei lai yalap ha kani ka Election MDC.

Ha ka chithi wa da li booh, da ong wa ki waheh chnong deilang ki sordar ka Khasi wa Jaiñtia Hills ym bien ki wow e bor yow lai yalap Election wei da em leh kiwa booh dei por wa eh bha hadooh wa da ktah yei lai yalap Election ka Party deiwa miat.

U Dr. Ricky J Syngkon, General Secretary ka VPP uwa da soi ya ka ujor da ong u wa em ki chnong kiwa da chah wow pynman du da ki Common Platform donhi wei kani man ko pyrchah ya ka Article 19(1) ka Constitution ka ri kawa da e laitlooid wow lai klam wow lai pynsñiaw.

Kamtæ ka Party da kyntu ko ya u Commissioner & Secretary wow batai bniah cha ki bor pynlai chnong wym toh u khang ki yei lai yalap Election neibhah kini man ki pyrchah ya ka aiñ wei da pynthut i ya ki kyrtong kamjooh ya ki Party.

Kam wow pynkynmoo wa ini wadep ka Mawlai Town Dorbar deiwa yaklam wa ki kyrtong MDC da rai ki wow pynman da ka Common Platform hawa wan yalap Election yow lait u thut ki khynnah wa yaleh Exam kamjooh ki paidbah wa chong chnong.

Related posts

Paan u Sanbor na u Rajnath dei thaw ki chiphai yow yarap pynkyllooid ya ka Shillong

January 30, 2025

U Treiborlang Suchen wa thap pyrtuid nyngkong na Amlarem Sub-Division

January 30, 2025