Ynne ka sngi u Treiborlang R Suchen uwi na ki kyrtong ka 3-War West Constituency wei kam u kyrtong samen (Independent Candidate) na ka War West People Progressive Forum toh uwa nyngkong dooh wow thap pyrtuid na Amlarem Sub-Division ha yung krehkaam u SDO wow yakhun ya ka Election MDC cha ka JHADC 2025.
U Treiborlang da ong u wa da pyrchang u katwa ye wow poi cha ki chnong yow kyrpaad ya ki waheh, ki manbei manpa, khynroo wa khyllood yong ka 3-War West Constituency wow kyrchaan ya oo ha ka Election MDC 2025 wei wow jied ya oo kam u MDC.
Da ong u wa ka thong yong oo nadooh wa raikut u wow chakri ya ka thaaiñ 3-War West Constituency deiwa man MDC toh wow wanrah ya i roi i paar, i yatylli lang ki chnong ki thaw, ki yurim ha ka shynchaar ka khadar, wow pynneh pynbha ya ka riti dustur, wow thooh ki laad kammon wow pynphooh pynphieñ ya ki yaaw ki haat haka thaaiñ Amlarem wa Dawki wa kiwi ki thaw wei wow yada yei hok ki tre chnong.
Chooh chooh da ong u wa lada jied ki ya oo kam u MDC yong ka 3-War West Constituency, ha kini ki san snem ki wow wan, ki kaam kiwa hakhmat dooh ya oo toh wow kreh u wanrah ha ka Constituency wow burom wei wow pynneh pynsah ya ka riti dustur, ka rukom im, i tre i thied, ki chnong ki thaw, wow yada yei khyndaw u chyiap, ki um ki wah yong ki tre ri, wow pynneh yei chongsuk chongsaaiñ wei wow yada wow paitlang ya ki paradoh kiwa sah ha khappood hapoh ka thaaiñ hapoh ka Constituency wa khamtam kiwa sah cha thaaiñ Block-I.
Discussion about this post