Pynkulmar u khon u MLA deiwa mih na yung yow lai Bangkok khlem da khana hadooh wa kylla Kidnapping Case

Ha iwi i jia wa da pynkhyrngiat ya kiwa boon heiwa da em wa pyntip cha ki pulit ka Pune wa chah rahbor u khon u Tanaji Sawant uwa man kam u MLA ka Shiv Sena wa u Montri sorkar warim ka Maharashtra, da pynkulmar ko ya kiwa boon heiwa da chah pynbaad u Tanaji wa da pynemkaam bakla u yei bor u.

U khon u Tanaji uwa tip kam u Rishiraj (32 snem) da suba wa chah rahbor u na Pune Airport cha Bangkok deilang wa ar ngut ki bru kiwa da chim wai ya kawi ka lieñsuiñ khian (Falcon 2000LX) deiwa pynlut Rs. 78 lak.

Yeni da em wa pyntip cha ki pulit lyngba ka Phone heiwa da booddien ki wa ka yung ka sem kiwa da ong wa u Rishiraj da chah rah u ha ki bru wym tipmit wei ym em khana u wa daw lai u cheiwon cheiwon neibhah ym jooh lai u khlem da pyntip chwa tangwa da ku kari wa kiwi ki bru yow lai cha Airport.

Ini toh iwa da jia ha ka 10 tarik uni u bnai heiwa da hær ki na Pune heipor 4:30 i janmiet heiwa ki pulit deiwa suba wa chah rahbor u Rishiraj da pyntip ki cha ka Air Traffic Control yow pha liwan ya kani ka lieñsuiñ kawa dapoi chiteiñ luti heiwa da phah hiar ka ha Chennai heiwa waroh kiwa em hapoh da hiar ki wei kani ka lieñsuiñ dapoi biang ko ha Pune heipor 9:00 waje i miet ka jooh ka sngi.

Related posts

Lai pynyoo ka JSU yei kyrchaan ya ka Prof. Sherwin May Sungoh

May 24, 2025

Mih i pyrchah yei thmu pynman smat ya ka SSLC Exam na iwa jooh

May 24, 2025

U Tanaji hawa yaklam wa kiwa thoh khubor da ong u wym em i yamai næ i awri awra wa u khon u wei hei miet da yaklam u wa oo neibhah wa 8 sngi chwa dang dep wan u na Dubai iwa da pynkhyrngiat won ya oo kam u pa wa ileh won lai u cha Bangkok syndet syndet khlem da pyntip wei na ini i daw da pynkuslai ko ya ka yung ka sem ki.

Chooh chooh da pyntip u wa kini ki bru wa lai lang wa oo u khon u toh ki lok hi u.

Ka heh ka Shiv Sena (UBT), ka Sushma Andhare da pynbaad ko wa u Tanaji da e u da ka False Kidnapping Case du yow wanrah biang ya u khon u cha yung deiwa pynemkaam leh yei bor u kam u Politician wa i bor poisa. Da pynbaad ko leh wa u khon u Tanaji da mih u na yung u hadien wa yamai u wa oo.