Ka kynthai kawa dang 18 snem kawa puræ Class-XII wei lai Coaching ha Gorakhpur, Uttar Pradesh da pynkut ko yei mynsien hadien wym ye ko u lehbha ha ka Joint Entrance Examination (JEE) Main 2025 katkam wa da thmu.
Ini da jia i ha ka 12 tarik uni u bnai du hadien chi sngi wa pynbna ya ka Result ka JEE Mains kawa man ka Exam yow yoh u lai puræ ha ki Engineering College wa em ha India.
Kani ka kynthai toh kawa tip kam ka Aditi Mishra wei i chnong tre toh na Mishraulia wa em ha Sant Kabir Nagar District.
Ha ka chithi wa da ieh ko chadien da paan maap ko neidaw wa yoh Marks ko da kiwa khian wei ym ye ko wow pynhun yeiwa angnood ka bei wa u pa ko.
“Maap ya nga bei, maap ya nga pa, ym ye O u poi cha ka thong. Ka luti yong i chirrup deilang da kut ko heini. Ham yaam. Maya bha phi ya nga tangwa nga ym ye O wow pynhun yeiwa angnood phi. Sñiawbha pait ya ka Choti, ka daw ye ko wow pynhun yeiwa angnood phi. Na ka khon phi ka Aditi”.
Ka Aditi toh kawa lai puræ ha Momentum Coaching Center ha Gorakhpur yow pynkhreh ya ka JEE wei da sñiaw diaw ko hadien wa duna bha ki Marks wa yoh ko hadooh wa pynkut ko yei mynsien.
Da sah ko hapoh ka Satyadeep Girls Hostel deilang wa kawi won ka kynthai kawa da liwan noh ar sngi chwa.
Katkam wa pyntip kiwa ha-yung ka Aditi, dang dep yaklam ko wow pa ko ha ka sngi wa jia ini heiwa da ong ko ya oo wym toh u khana bru yei duna Marks ko heiwa oo da pynchlur u ka wow pynkhreh yow yaleh biang sa chisien khlem dapoi pyrkhat wow pynkut ko yei mynsien ko.
Yei metyap ko da chem da kawa sahlang waka heipor wa liwan ko wei hadien wa choh dwar ym em wai ko, wei manda jngieh na ka yit da yoo wa da pasi ko deiwa pynman tylle da ka that. Kamtæ da lai pyntip ko cha ka Warden wei da wan ki pulit wow wai ya ka dwar kiwa da chem leh ya ka chithi wa ieh ko.
Discussion about this post