Ka KSU Mawprem Circle da kyntu ko ya u Deputy Commissioner ka East Khasi Hills, u Abhilash Baranwal wow yakhun yei thang palatpood ya ki bomkala hei miet heipor Diwali.
Ha ka chithi cha u DC, u President ka Circle u Badonkupar Nongbri da ong u wa i lehkmen Diwali ymtoh u wit i yei chongsuk ki paidbah ha Mawprem
Da ong u wa ka seiñ burom ko ya ka Diwali wei man kyrpang ko tangwa emkaam u pyrkhat leh ya i chait i khlan ki paidbah, ka mariang wa kiwi ki para bru.
U Badonkupar da ong u wa i thang slem ya ki bomkala palat yei por wa da booh nadooh 8:00 PM hadooh 10:00 PM da wanrah i yei tieñ ha ki khynnah, kiwa da heh rta, kiwa kjut chitom wa kiwi, kamtæ da dawa wa emkaam u em i bahkhlieh wei i burom iwi ya iwi.
Ka chithi da kdaw ko leh ya ka hukum ka Supreme Court wow thang bomkala da ki wym toh u ood ki palat ya ka 125 dB(AI) næ 145 dB(C) deiwa kheiñ nadooh i thaw wa thang ki.
Ka seiñ da kyntu ko leh ya u DC wow pynmih hukum yow pynkrehkaam deiwa rkhiñ ya ki kyndon, u pynchitom ya kiwa tyngkheiñ kyndon, u pait bniah leh ya ki jait bomkala wa dai yow lait u dai da ki wym chah kamjooh wow pynsñiawthooh paidbah yei ktah nei thang palatpood ya ki bomkala.
Discussion about this post