Heiyatoh wa ka 21 tarik uni u bnai kawa man kam ka sngi thap Vote ka Election MDC cha ka Jaiñtia Hills Autonomous District Council, neiliang u District Magistrate ka West Jaiñtia Hills District da pynmih u ya ki kyndon deiwa pynkrehkaam ya ka Section 163 BNSS ka wow krehkaam nadooh 4:00 waje i janmiet ka 19 tarik hadooh 4:00 waje i janmiet ka 21 tarik uni u bnai.
Hapoh ka hukum ha kitai ki tarik da khang yei yalang palat 5 ngut ki bru kamjooh wow pynman ki yalang wa i yaklam paidbah kiwa yatoh wa ka Election. Chooh chooh da khang leh wow pynemkaam ya ki tanghæng kiwa yatoh wa ka Election ha kini ki 48 kynta wa da kdaw haneiñ.
Kini ki 48 kynta toh kiwa emkaam bha yow lai bait waroh ki kaam wei wow man leh ka Election kawa khooid wa suba. Kamtæ hapoh ka kyndon Section 126(1) ka aiñ Representation of the People Act, 1951, da khang yei lai yalap Election 48 kynta deiwa kheiñ hadooh ka kynta wa kut i thap Vote wei ini khang man ko leh hadooh ki yalang paidbah wa kiwi de kam kini kiwa hap wow sangeh.
Da khang leh yei saam poisa, ki tiar ki tar, i kiad wa kiwi de kiwa ye wow ktah yei rukom thap Vote.
Ki bru wa wanrah na baar ki Constituency yow yalap Election ki wym em man kam kiwa thap Vote ka Constituency daw hap ki wow mih noh. Da khang leh wow booh thaw sah ya kiwa na baar kam ha ki Tent, ki Camp, ki Community Hall wa kiwi de tangwa ini ym krehkaam ko ya kitu kiwa ksoh kaam ha ki Political Party kiwa man kam ki In-Charge ka District.
Chooh chooh da khang wow pynman ya waroh ki jait Exit Poll/Opinion Poll næ kiwon kiwon ki jait wa ong kiwon wow jop wow rem deiwa pynmih khubor ha kiwon kiwon ki rukom ha ini i por.
Discussion about this post