Ha iwi i jia wa yoo chyrkhei, kawi ka khynnah skur kawa dang 6 snem da mynsoo joor ko hadien wa chah dat ko ha uwi won u khynnah skur uwa 8 snem i rta hapoh ka kamra skur heiwa uni u khynnah da sngoh u ka na khlieh boonsien da u moo blok, da pynemkaam u leh da u kchu syntu, da kyrtem u ka leh na khlieh wei da sngah u leh yei khlieh ko ha ben iwa da jia ha ka Government Model Senior Secondary School, Sector 20, Panchkula ka jylla Haryana.
Yeini waroh da yoh u riñ da ka CCTV heiwa da yoo wa nyngong uni u khynnah da sngah u yei khlieh ko ha ka ben dep tæ taan sñiooh u ka, kynjet u ka wei da mih u na kamra deiwa wan biang deiwa rah moo blok ha kti deiwa kawang oo ha khlieh kani ka khynnah wei da pynhaap u da uni u moo blok boonsien ha khlieh kani ka khynnah hadooh wa mih snaam wei da kyrtem u ka leh boonsien ha kylleiñ i doh ko deilang na khlieh.
Ki pulit da pyntip ki wa ini toh iwa jia ha ka 28 tarik u October wei ya kani ka khynnah da sumaar ha PGI Chandigarh wei da lait ko nei maa heiwa da khyrngiat ko hadien le sngi wa yapler ko na ini wa jia.
Ya uni u khynnah dang leh ya ka Psychological Evaluation da ki Expert katkam ka aiñ Juvenile Justice Act, wei daw leh katkam ki kyndon ka aiñ.
Ki pulit da chem ki leh wym em iwa biang wa leh da ka skur heiwa da booh FIR leh pyrchah ya kani ka skur hapoh ka aiñ JJ Act wa ka BNS wei kattu daw wanrah leh da ki SOP kiwa hap bood da waroh ki skur.
Neiliang ka sorkar Haryana da thung ko da ka Committee yow takit yeini wa jia wei da pynbna leh wow pynlut ka sorkar yei bai sumaar kani ka khynnah.
Katkam wa khana u ma kani ka khynnah, uni u khynnah da khut u ya kani ka khynnah cha kani ka kamra wym em bru deiwa ong ya ka wa khut u pa ko ka.
Da khana u leh wa da lai ko cha kani ka kamra heipor 3:15 i sngi wei uni u khynnah da dat u ka da u moo blok kamwa 7-8 sien, da sngah u leh leh yei khlieh ko ha ka ben, da dat u ka leh da kawi ka Aluminium Dustbin dep tæ mih u na kani ka kamra tangwa da wan biang u kamwa hadien chiteiñ kynta heiwa da dat biang u ka.
Ka yung kani ka khynnah da tip ki yeini hadien wa uwa yah Auto-Rickshaw uwa jooh lai thooh ka na skur ym em chem u ka, kamtæ da pyntip u cha u pa kani ka khynnah uwa da lai wut-wut cha kani ka skur.
Chooh chooh da khana wa manda poi u pa kani ka khynnah ha skur, pyn da u khynnah wa dat ka wa lai pynyoo heiwon em kani ka khynnah heiwa kat u chem ka da man kamwa ar kynta haroh nadooh wa chah dat ko.
Ya ini wa jia ye phi u pait heini: https://twitter.com/jafar_mahmood07/status/2116426345962238241?a=fKEjTDogYFQUXWiiGWo&s=20
Discussion about this post