Ynne ka sngi da pynman yei jied ya u Chief Executive Member (CEM) ka JHADC heiwa da em ar ngut ki kyrtong kiwa yaknieh ya kani ka chuki kiwa kynthup ya u Thombor Shiwat uwa man u MDC ka Moodop Umladang wa u Madonbai Rymbai uwa man u MDC ka Amwi Khliehtyrshi.
Ha ini i jied CEM da em du 20 ngut ki MDC wa chimbynta heiwa ki MDC ka VPP ym em u wan chimbynta ki.
Hawa ñiaw ya ki Vote, u Thombor Shiwat da jop suk u deiwa yoh 17 Vote katwa u Madonbai Rymbai won da yoh u 3 Vote donhi.
Hadien ini neiliang ki 18 ngut ki MDC da kitbok ki ya u Thombor Shiwat wa man u kam u CEM wa thymme ka Council.
U Madonbai hawa e i klam khublei da kyntu u ya u Thombor wow yahkhmat ya ka Council dei miat dei bha neibhah wa ka Council da hiar bha ko ha ki 6 snem wa dadep, da kdaw u yei chitom poisa ka Council khamtam nei laitrood ka poisa ka Council deiwa kyntu wow man u bru wa kreh chitom ha ki liang wa boon.
U Krison Langstang hawa e khublei ya u Thombor da ong u wa ha ki 5 snem wa dalai dadep chakri u Thombor kam u CEM wei yooluti u wow pteiñ u wow chakri sa ha ka samoi wow wan.
Neiliang u Bison Iano da ong u wa ha ka samoi wa dadep da thut ar snem nei wan ka khlam, kamtæ da kyrmen u wow ye u kreh pura neibynta i bha ka Council waroh kawi deiwa ong wa ymtoh u yait (Abstain) næ u yut na ka Council ha ki kaam wa bha.
U Lasky Rymbai da ong u wa u Thombor da man u kam u CEM la le sien kattu wei ngait skem u wa u Blai u e bor ya oo wow yahluti u ya oo neibynta i bha i miat ka Ri-loom Jaiñtia deiwa pynthymme leh ya i rukom kreh ka Council.
U Moonlight Pariat hawa e khublei ya u Thombor da ong u wa la soo sien jop u kam u MDC wei le sien man u kam u CEM kamtæ da kyrpaad wow chakri salonsar ya waroh ki 29 ngut ki MDC.
Ka Violet Lyngdoh hawa e khublei ya u Thombor da ong ko wa lyngba i yahkhmat yong oo daw ye u yarap ya ka Ri-Jaiñtia waroh kawi.
U Aiborlang Shadap hawa e khublei da ong u wa ha ki 6 snem wa da lai chadien da chem wa u Thombor da chakri paka u ya waroh ki MDC ka Council.
Neiliang u Rikut Parien da e khublei u ya u MDC ka Moodop Umladang wa da chah jied u kam u CEM wei kam u bru wa da jooh yahkhmat yooluti wa daw yah u leh ha ki snem wow wan khnang wow ye u pynbait ya i eh i khor ka jaitbru yong i.
U Wailadameshwa Siangshai da e khublei u ya u Thombor deiwa ong wa ha ki snem wa dadep da thkoh i krehkaam ka Council wei yooluti u wa nei krehlang ki MDC daw ye u pynkhai-im biang ya ka JHADC.
Heiyatoh wa i wym em chimbynta ki MDC ka VPP ha i jied CEM, hawa yaklam wa ki MDC da khana wa ka Party da rai ko wow chong ha ka Liang Pyrchah.
Discussion about this post