Ka Meghalaya Commercial Truck Owners and Association – Jaiñtia Unit (MCTODA-JU) toh kawi na ki chnat seiñ wa dang sdang wot ha Ri-loom Jaiñtia wow pait yei bha i miat ki tre Truck kamjooh kiwa yah Truck.
Neiliang u Heibormi Pariat, u President ka Jaiñtia Unit da ong u wa da sdang ya ka seiñ hapoh Ri-loom Jaiñtia ha ka 26 tarik u bnai wa dep wei ka seiñ daw yarap ko ya ki tre wa kiwa yah Truck hajrong i dor i bai kit ya ki mar wa mih na ka jylla.
Da ong u wa ka seiñ cha Ri-loom Khasi dadep yarap ko ya ki Truck ha ki thaw khrong dan yong ki District Council kamjooh hei lai i wan ki Truck.
Ka seiñ da krehkaam ko ha ki District ka South West Khasi Hills, East Khasi Hills, West Khasi Hills, Ri-Bhoi wei katni da sdang sooh thied ko sa ha Jaiñtia Hills, deiwa pynrap wa ka Association daw pait sani ko yei eh i khor khamtam nei ah ya ka bai kit na ki karkhana waphær waphær.
U General Secretary ka seiñ, u Shanborlang Suchiang da khana u yei chemchitom ki tre wa kiwa yah Truck heipor wa kit ki ya ki mar heiwa wot ya ka kisti ym dap ko wow su cha ki Bank deiwa e nuksa wa ya ka bai kari na ki karkhana Coke man ko du Rs. 1200 chi Ton wei hajrong ini emkaam ya ka seiñ wow kreh hok ya ki kaam wow yakhun neibynta i hok yong ki.
Da kyntu u ya waroh kamjooh ya ki karkhana waphær waphær hapoh Ri-Loom Jaiñtia wa ymtoh u pynemkaam da ki kari yong ki hi namo ki yong ki karkhana hi hawa kit mar neibhah ini ktah i ya ki tre jylla deiwa ong wa ki tre jylla emkaam u yoh nyngkong ki ha i kit i bah ya ki mar wa pynmih napoh jylla khnang wow ye u pyndap pynbiang ya ka yung ka sem.
Da khut u ya waroh ki dkhot yong ka seiñ wa toh u man kiwa yatylli hawa em kiwon kiwon ki kaam wow dawa ya ka hok kam ki tre wa kiwa yah Truck khnang wow man i kaam iwa jop.
Discussion about this post